Si Tay Poloy
Akong mga pahasubo alang sa pamilyang Coliflores ug Parado nga ning panahona nagbangotan gumikan sa pagtaliwan ni Tay Poloy.
Si Tay Poloy amahan ni Mam Aylin Coliflores Parado. Nakaila ko ni Tay Poloy. Sa dihang nadestino pa ako didto sa Mohon akong makaestorya si Tay Poloy every time nga mohapit mi sa ilang panimalay sa dili pa namo himoon ang nagkadaiyang mga mission appeal.
Si Tay Poloy kalmado nga tawo. Gani, matinahuron siya kaayo.
Wala pay COVID-19 kaniadto samtang moamin ako niya iyang bawion ang akong kamot dayon iyang hagkan. Kini mao ang iyang namat-an og buot.
Mao gyud nga maayo niya pagpadako ang iyang mga anak. Subo palandungon nga nitaliwan na siya apan salamat lang gihapon sa Dios tungod kay nitaliwan siya hinog na ang iyang panuigon.
Ang kinabuhi sa tawo daw sama sa usa ka binhi. Kun alimahan pag-ayo moturok kini ug molambo. Ug unya abton og kahamtong sama sa imong tanum.
Kay inumol man sa gugma gugma sa isig ka ingon. Nindot gyud kun ang kinaiya ni Tay Poloy sundon sa kadaghanan kanato.
Daghang mga higayon nga bisan unsaon pa nimo og tinarong sa imong kinabuhi daghan gihapon ang naghimo niining miserable alang nimo.
Dunay mga sugilanon nga mahimong pun-an o kuhaan. Ang kinabuhi usahay puno kaayo sa kalisdanan ug pagsulay. Daghan kaayong pressures. Daghan kaayong sungog.
Sa akong pagsud-ong sa panagway ni Tay Poloy diha sa akong panumdoman nakita ko ang iyang pahiyom ug ang iyang pagkamapaubsanon.
Ingon ini ang kabilin nga padayong nagdasig sa matag usa nga maningkamot inubanan ang pag-ampo kay ang Dios dili motalikod sa hilak sa kabus.
Salamat Tay Poloy sa imong kaayo. Salamat sa daklit apan malungtarong kasinatian uban nimo.
- Latest