EDITORYAL - Turismo sa Sinulog

Tungod sa pandemiya sa coronavirus daghan kining kausaban nga nahitabo.

Karong tuiga, daghan sa naandang mga kalihokan ang dili na mahinayon tungod sa peligro nga dala niini.

Matag Pista Senyor modagsa gyud ang mga deboto gikan sa nagkalainlaing mga lugar aron tumanon ilang mg panaad. Gawas sa relihiyosong kalihokan, naa pay kulturahanong kalihokan nga mo ang nabantog na nga Sinulog Festival nga salmutan og daghang contingents gikan sa lain-laing lugar.

Ang pagdagsa sa mga tawo dinhi nagdala usab og kasikas sa ekonomiy dili lang sa Cebu City kondili hasta sa mga silingang mga siyudad.

Kini tungod kay ang Sinulog ug Pista Senyor dili man ekslusibong ang Cebu City ray magselebrar.

Ang Lapu-Lapu City pinaagi sa daghan niining hotels ug maanindot nga mga beach resorts ug mga isla maiy sagad estaran sa mga turistang mosaksi sa Sinulog. Ang Mandaue City maoy agianan sa mg turista gikan sa Lapu-Lapu kung moanhi sa Cebu City. Sa laktod,ang tulo ka siyudad makabenepisyo gyud sa pangilin.

Gawas sa maong mga lugar, hasta ang mga resorts sa kalungsoran sa probinsya sa Sugbo makabahin sab sa turismo aning bulana sa Enero matag tuig.

Apan tungod aning pandemiya dako kaayo ang mawala nga abot nga dolyares gikan sa turismo. Maihap ra ang mga turistang nanganhi.

Samot na nga ang nagunang mga turistang tiganhi matag Sinulog gikan man sa mga nasud nga grabeng naapektahan sa coronavirus sama sa China, South Korea, Japan, Amerika, Uropa.

Tungod sab sa hulga gihigpitan bisan pisikal nga presentasyon ug pisikal nga pagsaksi sa mga pasundayag. Dili kinahanglang irisgo sa mga opisyal ang kaluwasan sa publiko.  Mahimong palabyon lang una kining mga presentasyon kay ang mahinungdanon mao man ang pista.