Pagsaulog sa pagkahimugso

Feastive kaayo ang pagsaulog sa pagkahimugso sa atong Ginoo. Gani ang pasiunang awit sa pastorela nagpadayag man niini. Aron atong masabtan, ang awit nagkanayon:

Ang Bituon sa langit nga misidlak karon

Dili sama kahayag sa kanato midan-ag

Sa lawom kagabhion gibanwagan kita sa mesiyas, Sa Mesiyas!

Sa maong awit ang gipasabot nga bitoon mao man kadtong bitoon nga gipangita sa mga tawong maalamon. Ang maong bitoon nga resulta sa usa ka planetary conjunction.

Apan kun paladman nato ang maong hitabo ginamit ang mga mata sa pagtuo, nakita nato nga dunay rason kun hinungdan ang matag paningkamot.

Kay ang mga maalamon wala lang moadto aron lamang makakita og extraordinary nga hitabo kondili niadto sila aron ilang simbahon ang hari ug ihatag kaniya ang tukmang pasidungog.

Ang awit sa Pastorella nga gihatagan og dasig nga honi ni Msgr. Rudy Villanueva. “Sa lawom kagabhion gibanwagan kita!” Ning panahon sa dakong kalisdanan nagkinahanglan gyud kita uyamot og lamdag.

Ang lamdag nga gikinahanglan nato aron kita mabuhi. Dili lang diha sa pagginhawa kondili aron mamahimo kitang makahatag og kinabuhi usab alang sa uban.

Don’t give to get matud pa. Give to inspire ug mao kana ang pinakamahinungdanong hunahunaon sa matag usa kanato nga ania karon dinhi sa kalibotan.

Nahatagan ko og kahigayonan nga makaadto sa Shepherd’s Fields didto sa Holy Land. Sa maong dapit gisaulog pud namo ang Santos nga Misa.

Ug bisan pa man kun duha na ka libo ang nilabay human sa maong halandumong hitabo, padayon gihapong lab-as ang kabugnaw sa panahon nga giantos sa mga magbalantay aron makaadto lang gyud sa Bethlehem ang dapit nga natawhan sa atong Ginoong Jesus. Ang kahayag nga ilang gipangita.

Maoy akong panghinaut nga ning panahon sa dakong kangitngit, makakita gihapon kita og dakong kahayag.

Kahayag nga magdala kanato sa tunhay nga kalinaw taliwala ning higayon sa dakong kalisdanan.  Ang maong awit nagdapit kanato sa gihapon:

“Karnero sa sibsibanan, tanom sa kaumahan, nunot kamo kanako kay akong halaran. Ug tambor sa musikero, lingganay sa simbahan, simbahon ta king yuta king masulob-ong yuta miabot si Jesus ang manunubos sa kalibutan!”

Gidagkotan ko ang nagbinugtong kandila sa paglaum sa akong kinabuhi.

Mahimong talikdan ko sa kadaghanan apan dili gyud mahitabo nga biyaan ko sa Kahitas-an.