Buaya diay kon dakpon mo?

Daghang driver nga dili gyud motuman sa mga gilatid sa balaod sa tukma nga pagmaneho og sakyanan, unya panahon nga sila madakpan, bisan unsa na lang ang ilang ipanulti aron pagdaut sa nidakop kanila.

Kaniadtong weekend, usa ka tawo nga nadakpan sa mga sakop sa Land Transportation Office (LTO), ni-post sa social media nga kuno mga “buaya” ang mga road law enforcers.

Nakaamgo tingali nga dili na makiangayon ang iyang gihimo, nangayo’g pasaylo ug miingon na nga dili diay angay’ng masuko kon dakpon sila kon makahimo og kalapasan sa balaod.

Ang akong ikatambag sa mga kauban ko nga motorista, nga angay kitang masuko kon ang modakop kanato mangayo’g bayad bugti sa dili pagsakmit sa imong lisensya.

Apan kon gidakop ka kay nakahimo og salaod, dili ka angay’ng masuko ug hinoon, himoa nga leksyon ang imong gidangatan aron nga dili ka na mohimo pag-usab sa maong salaod.

Kaniadtong Domingo, pwerteng daghana nga motorista nasakpan sa LTO ug sa iyang mga deputized agents, nga nagsakay og motorsiklo didto sa bukid ug wa na motuman sa lagda sa Transportation and Traffic Code. Apan way gidakop kanila, ug gani, gipanghatagan pa sila og mga bugas, ug may gihatagan og helmet. Apan sila gipasidan-an nga sa sunod kon sila masakpan, dakpon na gyud sila ug dili pasayloon.

Ambot ngano nga ang ubang mosakay og motorsiklo, bug-at man gyud sa ilang buot ang pagsul-ob og crash helmet nga para man kana sa ilang proteksyon? Maglibog ko ngano nga ang uban dili man moparehestro sa ilang motor?

Pananglit magdagan mo diha sa karsada, unya madisgrasya mo kay mabag-iran og laing sakyanan nga rehistrado, lupig gyud mo sa kaso unya. Mao nga tambag nako kaninyong mga kauban ko nga motorista, tumanon gyud nato ang balaod.

Sila gani si Presidente Duterte ug Senador Bong Go, kay hilig man usab sila nga mosakay og motorsiklo, giparehistro gyud nila ang ilang mga motor bisan og sila mga opisyal sa kagamhanan.

Sa usa ka mensahe, gipasabot gyud ni Senador Bong Go nga kon dili ka motuman sa balaod, maproblema ka gyud pananglit makasugat og disgrasya ang imong sakyanan.

Unya, timan-i ha, kadtong mga sakyanan nga ang plate numbers mitapos sa numero nga 7, 8, 9 ug 0, kutob na lang sa katapusan karong tuiga ang lugway nga gihatag sa LTO kaninyo.

Busa kay gamay na lang ang mga adlaw nga nahibilin, sige na, iparehistro na ninyo ang inyong mga sakyanan.