EDITORYAL-Aksidenteng gitakdang mahitabo

Usa ka aksidente ang nahitabo sa sud sa tunnel sa South Road Properties niadtong Huwebes sa gabii nga niresulta sa pagkakalas sa usa ug pagkaangol og pito ka motorista. Ang maong tunnel maoy labing unang subway sa tibuok Pilipinas nga napulo ka tuig gihimo sugod tuig 2001 hangtud 2011 pinaagi sa Tokyo, Japan ug Cebu City.

Nakadugang kini sa ka-moderno sa imahe sa siyudad ug nakatabang sa pagsulbad sa problema sa trapiko sa McArthur Blvd. ug Natalio Bacalso Avenue.

Ang maong aksidente gitakdang mahitabo gyud tungod sa mga kakuwangon sa habig sa mga motorista ug sa kagamhanan. Mahimo unta kining dili mahitabo kun gisunod lang gyud ang road safety.

Ang SRP Subway didesinyo nga two-way lane lamang ang maong subway. Wa kini gagmay nga dalan sa kilid diin mahimong mohunong ang mga sakyanan kun magkaaberya aron sab di mabalda ang ubang mga nagsunod nga sakyanan.

Kung moagi sa maong subway kinahanglang molahos gyud sa tumoy. Tanang mga motoristang nagsigeg agi sa maong subway nakondisyon na ang hunahuna nga way mag-parking sa ilawom kay bawal man kini.

Sumala pa sa report, nihunong ang maong mga motorsiklo sa kilid sa maong subway sa dihang nibunok ang uwan, sa laktod nipasilong ang mga nag-motor.

Apan wala sila managana nga posibleng dili dayon sila makit-an sa ubang sakyanan nga nagsunod kanila.

Kinahanglan na gyud nga aksyonan kini sa kagamhanan ug sa hingtungdang mga ahensiya sa gobiyerno aron dili na masubli pa.

Magbutang og dagkong safety signages, speed limit, butangan og CCTV cameras nga 24/7 mag-monitor, kinahanglang dunay gamay nga dalan sa isi’g ka kilid aron makapadaplin kadtong maaberya ug dili motiurok sa tunga. Labaw sa tanan, duna gyud untay traffic enforcer nga nakadestino sa isi’g ka tumoy nga magbantay ug mopatuman sa mga lagda sa trapiko.  Una sa tanan, responsibilidad sa matag drayber ang iyang kaugalingong safety ug sa iyang mga sakay samtang nagmaneho.

Responsibilidad sab sa gobiyerno pagsiguro nga dunay mga lagda silang ipasunod sa mga motorista ug sila mismo maoy seryusong mangusog pagpatuman niini ug andam nga mosilot niadtong mga makalapas tungod ug alang sa kaluwasan sa tanang road users.