Qpass rekisito pagpadayag sa pagtuo

Buot sa Cebu City Police Office (CCPO) nga bakwi-on ni Mayor Labella ang iyang hukom nga dili na kinahanglan ang quarantine passes niadtong buot motambong sa Misa de Gallo. Alang sa kapolisan, mahinungdanon gihapon ang quarantine pass pagkontrolar sa gidaghanon sa tawo nga mogawas sa ilang panimalay.  Dako na’g kalainan ang panahon karon. Sa una, mag-novena ra ang tawo aron makabaton og grasya.  Apan karon, tungod sa COVID-19, kinahanglan na ang quarantine pass una ka pa makapadayag sa imong pagtoo ngadto sa Kahitas-an.  Lord, patawad!

Basin maoy mabunalan

Misaad si Presidente Duterte nga sangkapan niya ang mga kapolisan og mga goma nga batutâ, inay mga uway nga ulisi, aron maoy gamiton pagpatuman sa lagda sa social distancing.  Gihulagway sa Presidente nga ang batutâ maoy unang linya sa depensa sa mga polis.  Mahinungdanon nga matudloan ug mabansay una ang kapolisan sa paggamit sa batutâ.  Kon wala’y kabangkaagan, basin baya mailogan ug sila na hinoon ang mabunalan sa katawhan.  Mao na’y giingon nga, “Naunay sa tarî”. Pagkatoytoy!

Una’ng mituslok, awahi natuslokan

Mikulit ug luna sa kasayasayan ang usa ka Filipino nga nurse nga si May Parsons isip maoy labing una nga health care worker nga mipahigayon pagdapat sa bakuna batok sa COVID-19 ngadto sa labing una usab nga pasyente nga si Margaret Keenan. Inay malipay sa maong balita ang akong silingan, mituaw na hinuon siya sa pag-ingon, “Una lage tinuod ang Pinoy nakatuslok sa bakuna, apan maawahi gihapon kita sa mga nasud nga mabakunahan.  Asa ang hustisya?” Baya no!

Libre’ng swab test

Mimando si Presidente Duterte ngadto kang Health Secretary Francisco Duque sa pagpangita og paagi nga makapahimulos ang publiko sa libre nga swab test kay alang sa Presidente, balaanon nga katungdanan sa kagamhanan ang pagpanalipod sa iyang katawhan.  Hinaut nga motuman gilayon si Sec. Duque sa mando sa Presidente.  Dugay na’ng nag-antos ang katawhan sa mga kanahan sa kagamhanan. Libre’ng swab test mao karon ang panawagan.  Kay gina-ingon nga “Kon ang imong katungod gilangan-langan, sama ra nga sa maong katungod ikaw gihikawan”. Fezteleern!

Lusot Kanunay Ang Kabaw

Matud ni PNP Chief Police General Debold Sinas, nahuman na nila ang pagpahigayon sa imbestigasyon mahitungod sa panagtapok sa katawhan didto sa usa ka lungsod sa Cebu nga gitambongan ni Secretary Harry Roque.  Iduso sa PNP ang resulta sa imbestigasyon ngadto sa DILG karong semanaha.  Bisan wala ibutyag ni General Sinas ang resulta, ato na’ng panghilantawan nga walay pakasad-on ang kapolisan sa maong kalihokan.  Sa balay sa kakâ, langaw ra ang madakpan, ang mga kabaw dili gyud mapugngan.  Matud pa sa pagya, “May’pa maglana’g potot”.  Atala lagee!