Way kridibilidad

Human mokatap sa social media ang mga hulagway atol sa gihimong mini suroy-suroy didto sa Bantayan Island niadtong weekend nga nagpakita sa nagdasok nga mga tawo, mimando dayon si DILG Secretary Eduardo Año og imbistigasyon.

Gawas sa DILG susihon usab sa Department of Education nganong dunay mga estudyante nga nag-uniporme nga miapil og sugat sa mga misalmot sa suroy-suroy bisan wala itugot ang linawas nga pagpahigayon sa klase.

Ang gihimong suroy-suroy didto sa Bantayan Island nahitabo pinaagi sa pagpanagtambayayong sa kagamhanan sa probinsiya ug sa Mactan Cebu International Airport aron iduso ang turismo ug pagpromote sa bag-ong tugpahanan didto sa isla.

Kabahin gihapon kini sa pagpaningkamot ni Gobernador Gwen Garcia nga mabuhi pagbalik ang industriya sa turismo dinhi sa lalawigan nga usa sa mga naapektuhan tungod sa pandemya.

Dili malalis basi sa mga hulagway nga duna gyuy nahitabong kalapasan sa health protocols. Apan inay hulgaon ang lokal nga mga opisyal og imbistigasyon, dili kaha maayong himoong ekspermento sa DILG ug sa Inter-Agency Task Force ang nahitabo?

Tun-an nila ang datus mosaka ba ang mga kaso sa COVID didto sa Madridejos human sa maong kalihukan.

Kun way epekto sa gidaghanon sa ilang mga kaso bisan sa panagdasok, tingali panahon na nga usbon sa IATF ang ilang mga lagda.

Panahon na nga tugotan pagbalik ang naandang mga kalihukan labi pa didto sa mga dapit nga minus ang kaso sa COVID.

Husto ang direksiyon sa gobernador pag-abli og balik sa ekonomiya, labi pa sa turismo.

Wala say kridibilidad ang DILG mangimbistigar sa hitabo tungod kay napakyas ni pagbadlong sa pagdagsa sa mga tawo didto sa Manila Bay atol sa pagbukas sa artificial white beach niini.

Wala sab mabadlong ni Año ang paglapas sa usa ka heneral kaniadto sa health protocols.

Sa kaso hinuon sa DepEd, angayang ipasabot sa mga magtutudlo ug tagdumala sa mga tunghaan sa Madridejos nganong ilang giangin ang mga estudyante.