Likayan ang makapatambok

Segun sa bag-ong direktiba nga giluwatan sa Philippine National Police, pahamtangan ug silot kadtong mga polis nga dili makatuman sa gilatid sa PNP nga tukmang body mass index (BMI).  Ang maong direktiba naglakip niadtong mga sobra o kulang sa timbang nga mga polis. Ni’ng maong direktiba, wala kaha maunay ang pangulo sa PNP??? Aron dili mapahamtangan sa silot ang hingtungdang polis, angayan nila’ng likayan ang mga butang nga makapatambok, sama sa SALAMIN, TIMBANGAN ug mga LARAWAN, aron wala’y mahimong basehan.  Baya no!

Sistema maoy salimbong

Gihagit ni Taguig Representative Alan Peter Cayetano ang PACC sa paghingalan sa mga kongresista nga nalambigit sa kurapsyon kon ugaling aduna sila’y gihuptan nga ebidensya batok sa mga hingtungdan kay kon pulos lang alegasyon ug pagduda, sama ra kuno nga nagnilabayay sila ug lapok sa usag-usa.  Sayod na ang katilingban sa kurapsyon sa kagamhanan.  Ang kaisog sa kongresista nga mohagit paghingalan naggumikan sa kahibalo nga ang sistema sa kurapsyon mao mismo ang nagpanalipod kanila aron dili mabulgar. Nasabtan kini bisan sa inosenteng kabataan mao nga aduna sila’y hagit-pagya nga nagkanayon, “Sumbong, Lubot sa Indong, Kiha, Lubot sa Maya”.  Tua ra!

Dakpon bisan mitabang

Ni’ng nagsingabot nga kapaskohan, mipasidaan ang Bangko Sentral ng Pilipinas (BSP) sa mga konsumidor nga magbantay sa posibleng pagpakatap sa mga pekê nga kwarta. Tambag sa BSP nga susihon pag-ayo kon peke ba o tinuod ang kwarta pinaagi sa pagtan-aw, paghikap ug pagtakilid niini.  Makapahinumdum kini sa storya sa akong amigo bahin sa reklamo sa nadakpan nga tigbuhat ug peke nga kwarta nga nagkanayon, “Maglibog ko sa gobyerno. Ingon naglisod og kwarta; unya kon ato tabangan paghimo’g kwarta, dakopon man hinoon ‘ta”.  Pagkatoytoy!

“Marka-bahala” na lang

Bisan sa hulga sa COVID-19, padayon gihapon ang katawhan sa pagdasok sa mga inilang sentro sa komersyo sa Manila sama sa Divisoria, alang sa ilang tinuig nga Christmas shopping. Adunay mga tradisyon nga malisod ihikling bisan pa man sa giatubang nga kakuyaw nga kanunay’ng gipahimangno sa gobyerno.  Ang gipakita nga kinaiya sa mga shoppers sa Divisoria makapahinumdom sa komedya bahin sa usa ka bungî, nga mipaturagas ug way kukahadlok nga mipadagan sa motorsiklo dayon ingon, “Mhahalag manga-mhungi”.  Madahaan!

Kanding nga humbâ

Tungod sa kata-as gihapon sa risgo sa pagkuyanap coronavirus, miawhag ang DOH nga likayan lang una ang pagpahigayon og mga Christmas party ug susamang kalihokan karong Pasko. 

Sa kinaiya sa mga Pinoy nga may pagkagwatsinanggo, hayan makahimo gihapon ug pamaagi nga makapahigayon og kalingawan karong pasko. Makapahinumdum sa komedya sa akong higala nga Muslim nga naglaway ug buot mokaon sa humbâ busa mihangyo siya sa tindera, “Nganli lang kana’ng humbâ og kanding kay amo hutdon”. Atala lagee!