Kaayohan sa tanan

Naukay ang mga tawo sa subling pag estrikto sa health protocol sa dakbayan sa Sugbo. Kasagaran negatibo kaayo ang reaksyon kay lagi naghatag kini og dugang kahasol sa daan nang nag-antos nga mga tawo ilabi na kadtong nanginabuhi kada adlaw.

Hasol man gyud tinuod kay malangan man ilabi na nga higpit kaayo ang mga otoridad sa pagbantay sa mga control points, kanunay usab nga nag-operate sa pagpanakop sa mga quarantine violators.

Apan angayan ba nga ikasuko sa mga tawo ang paghipit sa health protocol sa dakbayan sa Sugbo?

Angayan natong hinumduman dihang nahimong epicenter sa COVID-19 ang Cebu City nga giligo ni Mayor Edgardo Labella ang grabeng pagsaway sa publiko kay gamika lang kuno ug walay nahimo sa pagpahunong sa kagaw hinungdan nga mokuyanap.

Gani niabot sa punto nga gipaanhi pa sa presidente si Secretary Roy Cimatu isip COVID-19 Overseer ug gipa-augment usab ang mga sakop sa Special Action Force SAF.

Taliwala sa pa man sa kadaghan sa COVID-19 case sa syudad milampos sila sa pag flattened sa curve gumikan sa paningkamot sa tanan.

Karon nga ni-spike na sad ang mga kaso sa COVID-19 kay nibalik na sa double digit ang mga bag-ong kaso, niaksyon dayon ang mayor ug ang mga naglangkob sa EOC aron masumpo ang pagkuyanap.

Apan inay daygon kay abtik na ang syudad sa pag aksyon, gisaway naman usab og maayo ilabi na batok sa mayor nga halos nalang himolbolan sa mga negatibong komento.

Asa naman lang molugar si Labella ani? Seguro dunay mga punto nga gipadangat sa mga tawo gihulagway nga double-standard sama nalang sa panagtapok sa mga Edlab Riders nga wala kuno sitaha pero kadtong sa shoe super sale sa Lahug ang gilutos.

Mao usab kini ang hatagan og pagtagad sa mayor aron dili manghingampa ang uban kung ipatigbabaw ang patas nga pag tratar.

Sa isyu sa estriktong implementasyon sa health protocol, maayo kini nga lakang sa mayor kay minstras sayo pa makontrol ra ang virus kay kong magluya luya pastilan mangambot nalang ta unsay mahitabo.

Kadto ra mang mga tawo nga walay tuyo ang dili pwede makasulod sa syudad apan kadtong mga legitimate APOR dili man seguro maproblema basta naay ID ug certificate of employment. Ang mga mangompra ipakita lang ang business permit kong negosyante ug kadtong mga magkinahantlan og medical ipakita lang ang supporting document ug pwde ra gyud.

Dili na ta maka-afford nga mobalik sa kaniadtong grabe ang kaso sa COVID-19, seguro ang uban dili na motuo pero dili gyud angayan kompyansahan ang virus.

Bahala na og labayon ka sa pagsaway mayor, padayon sa imong gihimo tungod kay alang kini sa kaayohan sa tanan.