Bakit talamak ang corruption sa DPWH?
Ayon sa Mega Task Force laban sa corruption na binuo ni Presidente Duterte, karamihan sa mga sumbong ng katiwalian na tinatanggap nito ay nagaganap sa Department of Public Works and Highways (DPWH).
Magmula pa naman noong araw, ang DPWH ay nahahanay na sa mga ahensya ng pamahalaan na nangunguna sa katiwalian, kasama ang mga tax collecting agencies ng pamahalaan. Open secret naman iyan dahil ang mga naturang ahensya ay matatawag na vulnerable sa katiwalian.
Halimbawa, ang DPWH ay may ponder para makontrol ang bidding ng mga kontrata at puwedeng papanalunin ang mga kontratista sa mga public works projects na makapaghahatag ng mas malaking “padulas.” Sa kaso naman ng Bureau of Internal Revenue (BIR) at mga ahensyang nakaugnay dito tulad ng Bureau of Customs, puwedeng makipagkutsaba ang mga opisyal nito sa mga tiwaling negosyanteng nais mandaya sa babayarang buwis.
Iyan din ang kaso sa Bureau of Immigration na maaaring magpapasok sa bansa ng mga banyagang kahina-hinala ang karakter sa tamang presyo. Pero Ayon kay Justice Secretary Menardo Guevarra na namumuno sa Mega Task Force, karamihan sa natatanggap nilang sumbong ay mula sa DPWH.
Hindi nangangahulugan na pinakatiwali ang DPWH. Kaso, sa mga kaduda-dudang transaksyon sa ahensyang ito, may mga kontratistang natatalo sa bidding na marahil, sila ang nagrereklamo. Maaari rin na ang mga nagsusumbong ay yaong nasa loob din ng ahensya na nalamangan sa partihan.
Matagal nang problema ang corruption at maging si Presidente Duterte ay aminadong nahihirapan siya sa pagsugpo nito. Pero hindi dapat tantanan ang lahat ng pagsisikap na puksain ang katiwalian dahil salapi ng taumbayan ang nalulustay dahil sa mga kawatan sa gobyerno.
- Latest