Tungod lang sa tulo ka paresan sa sapatos

Dili pa lang dugay nagubot ang mga katawhan sa usa ka tindahan sa sapatos sa may Lahug ning atong Dakbayan sa Sugbo. Kini tungod kay sa kantidad nga P998 mahimong mapalit mo na ang paresan nga sapatos. Gani alang sa uban tingali mao na pud kini ang sinugdanan sa laing wave sa coronavirus sama sa nahitabo niadtong higayon diin kusog kaayo ang tapun-og sa mga tawo sa Carbon gumikan sa binigniton.

Nagpasabot ba kin inga kitang mga Sugbuanon gahi gyud og ulo o buot lang gyud kitang makadaginot ning haylo nga presyo sa sapatos. Ang pangutana worth it ba gyud kaha ang pag-adto niini aron lamang matakboyan sa sakit nga coronavirus?

Dali ra gyud kitang madani kun maghisgot na kita og presyo. Usahay dili na kita mag agad sa kalidad kay ang atong giapas barato. Bisan unsang butanga nga barato ato mang pagaisipon nga madanihon. Bisan pa man kun kini dili makaayo kanato.

Didto sa kaulohan padayong gilatos ni Ulysses ang ang atong kaigsuonan. Daghan na kanila ang anaa sa mga atop sa ilang mga panimalay gumikan sa baha. Ang ilang mga kabtangan padayong gibanlas sa kaalautan samtang padayong nagkurog ang ilang kalawasan sa kahadlok ug sa kapakyas ning maong trahedya.

Samtang ang gisaligan nga motabang padayong nipabuhagay sa malinlahong mga bakak nga pasalig sa pakigsandurot. Asa naman ang mga plano? Dili lamang pagduaw ang gikinahanglan kondili ang konkretong mga lakang sa pagtabang sa mga sakop sa panimalay nga nahimong biktima ning maong trahedya.

Samtang didto sa kaulohan ang tinguha nga mahatagan og igong pagtagad ang mental health mao nga gipanindot ang baybayon ang karong mga panahona gibanlas na lamang gyud sa dakong kangil-ad kay nigawas ang buhing matuod nga ang mga basura diay igo lamang gitabonan sa mga minerals nga dili natural sa maong dapit.

Paagi kini aron makabarato o paagi kini aron hayloon ang kinabag-ang katawhan sa baratuhong panghunahuna ug mga lakang nga kun buot hunahunaon wala man gyud kinahanglana labina ning panahon nato karon nign dakong pandemiya.

Balik sa mga sapatos. Sa akong personal nga panahom, kadaghanan gyud unta kanato ang buot mosubay sa dalan nga giisip natong luwas gikan sa bisan unsang katalagman. Kini tungod kay buot gyud kitang mamahimong gawasnon ug makalakaw bisan asa apan ang maong tinguha usahay monudnod kanato sa kalaglagan.

Kun hangtud asa kutob kining tanan bugtong Dios lamang ang nasayud. Hangtud kanus-a kaha ang diversions aron ang tanan ning walog nga luhaan padayong masalaag ug mailad sa pipila nga nag-isip sa ilang mga kaugalingon nga mga gamhanan.