Balaud sa gugma

Oktubre 25, 2020: Ikakatloan nga Domingo sulod sa tuig

Mga Pagbasa: Ex. 22; 20-26/Sal. 18/2 Tes. 1;5c-10/Mt. 22;34-40

Maisip natong usa ka purist society ang mga Judio ug to the letter ang pagsunod gyud sa balaud.

Mao nga ang nahitabo ang napulo ka sugo ilang gi-subdivide pa og laing mga 613 ka mga balaud nga kasagaran dunay dakong kalambigitan sa mga ritual purity laws. Kini nagpasabot nga higpit gyud tingali kaayo ang pagpatuman niini.

Apan ang atong Ginoo sa Ebanghelyo karong Dominggoha ang nihimo sa iyang summary sa napulo ka mga sugo.

Ang napulo ka mga sugo gilangkob sa usa lamang ka Dakong Sugo nga mao ang Sugo ug Balaud sa Gugma.

Balaud sa gugma nga mahimong mapadayag pinaagi sa Paghigugma sa Dios sa kinatibuk-an sa atong kinabuhi ug sa paghigugma sa atong isig ka ingon sama sa paghigugma nato sa atong kaugalingon.

Ning paagiha, nakatuman na gyud kita sa balaud. Kay unsa man diay ang paghigugma? Ania ang mga panahom kalabot niini.

1.  Ang gugma usa ka desisyon. Walay si bisan kinsa nga makapugos ni bisan kinsa nga mohigugma kanimo ug higugmaon siya.

Ang tanan nagsukad gyud sa usa ka hukom. Dili kini pagbati lamang usa kini ka dakong desisyon.

2.  Ang sukaranan sa paghigugma sa uban mao man ang paghigugma sa imong kaugalingon. Dili nimo mahatag ngadto sa uban ang bisan unsa nga wala nimo mahupti.

3. Ang hustong panahon sa paghigugma karong adlawa ug dili ugma sanglit ang ugma wala namay kasegurohan.

4. Ang gugma mahimong maalimahan kun maantigo kita sa pagsud-ong sa atong hinigugma diha sa iyang kaayo ug dili sa iyang kadautan. Kay sa mga higayon nga makita nato ang sipyat lamang nan, malisud gyud kaayo ang pag-appreciate.

5. Diha sa paggahin sa atong time, talent ug treasure, ang gugma mamahimong mas masabtan ug mas masinati ni bisan kinsa nga nagtuo sa bili niini.

Atong hinumdoman nga sa tanang mga birtud pinakamahinungdanon ang paghigugma.

6.  Ang gugma nga bug-os ug tinuod maantigo nga maminaw, kanunay nga abli ug kanunay mohunahuna sa kaayohan ug kanunay mohimo og kaayohan alang sa uban sa way pagpaabot nga baslan.

7. Ang gugma gikan sa Dios ug sa matag higayon nga ato kining himoon atong gimantala ang Diosnong kalooy sa mas konkretong paagi.

Kun kini pa lang unta ang gihunahuna sa matag tawo ning panahon nato karon, nan dili na gyud unta kinahanglanon pa ang pagpangdakop, panggukod, kagubot ug uban pang mga dautang buhat.

Kun gugma pa lang ang anaa sa matag usa, nan dili unta mamhimong tig-a ang tanan diha sa paghimo og mga lakang alang sa kalamboan. Ang tanan maayo gyud unta.