Videoke king and queen ban na sa adlaw

Nahimong pahungawanan sa kalaay ang pagsiyaok og kanta sa videoke. Bahala og yabag basta makakanta wagtang gyud ang problema.

Ambot ba nganong mogaan man ang atong pamati kong makakanta ta. Ilabina kon naay echo nga feelong nato nindot kaayo ta nga mokanta.

Ang gakanta nindot sa iyang pamati pero ang mga tawong nakadungog munamuna na sa kalagot kay pwera gaba dili gyud madala sa dunggan.

Wala seguroy problema kong nindot gyud kaayo ang tingog kay makaingon ta nga pwera buyag nindot gyud. Pero lahi na kon moingon ang tawo nga pwera gaba kay bati gyud kaayo na.

Bitaw karong panahona duna na gyuy basehan ang mga tawo nga moreklamo kon adunay mag-concert nga adlawang dako kay duna namay mga bata nga maapektohan.

Ang mga tinun-an nga nag-home study karon kay new normal man lagi, busa gikinahanglan nga walay makadisturbo sa ilang pagtuon.

Gisugdan na sa kapolisan sa syudad sa Sugbo ang pagpaniid sa mga feeling concert king and queen sa videokehan.

Kini aron maseguro nga malinawon kaayo ang palibot sa pagtuon sa mga bata nga nag-online o modular classes.

Dili baya lalim nga mag-eskwela nga walay maestra nga magtudlo sa personal. Bisan naa pa ang ginikanan nga maglisod pud intawon sa pagsabot sa mga leksyon.

Mas mapalig-on ang paghigpit niini kay mipagawas man og executive order si Mayor Edgardo Labella sa mas hugot nga regulation sa videoke.

Alas 8 sa buntag hangtod sa alas 5 sa hapon gikan sa Lunes hangtod sa Biyernes bawal ang videoke sa Cebu City. Aw naa pa man diay duha ka adlaw nga makakanta dili na tantong lugi ang mga feeling singer.

Maayo unta dili lang sa Cebu City kon dili apil sa tanan lugar ipatuman kini tungod ug alang sa mga bata.

Bitaw angayan magtinabangay ang tanan karon sa pagsuporta sa mga bata sa ilang pagkab-ot sa edukasyon.

Sakripisyo lang sa mga singer, mag-sound of silence lang sa ta aron dili madakpan kay basin mataymingan sa mga pulis madakpan.