Mga durugista sa likod sa rehas

Mas gipahugtan karon sa Philippine National Police PNP,  Philippine Drugs Enforcement Agency PDEA , Bureau of Jail Management and Penology BJMP ang ilang pakig-alayon alang sa mas lig-on ug epektibong kampanya batok sa illegal nga drugas. Kini kalabot sa kalambigitan sa mga inmate sa prisohan sa negosyo sa illegal drugs bisan og naa sila sa sulod sa jail facility apan business on the go gihapon sila pinaagi sa mga gaway nila sa outside world.

Matud ni Police Col. Josefino Ligan, ang director sa Cebu City Police Office, nga common denominator sa mga durugista nga ilang madakpan magtumbok man sa mga inmate sa bilibid nga maoy naa sa likod sa illegal nga drugas. Niining bag-o lang 6.1 kilos nga shabu nga nagkantidad og P41 million ang nasakmit sa kapolisan sa Barangay Inayawan diin nadakpan ang duha ka mga drug personality.

Sa ilang interogation sa mga dinakpan gikan kuno sa usa ka “Jaw” nga PDL sa Cebu City Jail ang utok sa kontrabando. Atol sa presscon, wala angkona ug wala usab ihimakak sa warden sa jail facility Supt. Julius Arro ang posibilidad nga nalambigit ang ilang mga binilanggo sa illegal drug trading.

Apan duna gyud kunoy mga instances nga mitumaw kini nga scenario dili lang sa City Jail kon dili bisan sa ubang pasilidad. Kini tungod kay naa may magamit nga mga kahimanan sama sa cellphone. Nan ang pangutana nganong dili man gyud masumpo ang pagpalusot og mga gadget sulod sa prisohan?

Kong dili masanta ang pagsulod sa mga kahimanan sa komunikasyon sa mga jail facility nga kong tan-awon sayon ra man unta nga matawag nga ginagmay unsa nalang kaha sa mas dinagko sama sa kalihokan sa shabu trading. Wala man sa sulod ang shabu apan padayon ang paglipang niini kay sayon ra man kaayo makapalihok ang utok nga anaa sa sulod sa prisohan.

Usa sa lakang nila ang pagtaod og signal jammer pero dugay naman ning planoha wala man gihapon mapatuman tungod sa limitado nga resource.

Hinuon ang LGU pinaagi sa mayor mipasalig man nga mohatag sa ekipo alang sa mas epektibong pamaagi sa pagsanta sa problema sa drugas. Dugay na ang kampanya batok sa illegal drugs, atangan nalang nato hangtod asa masakpan sa mga tinugyanan sa balaod ang mga nagpasiugda niini.

Kong tinuod man nga naa ra sulod sa prisohan, maisip nga naa ra gyud diay sa ilang palad nga kaya ra nila sumpoon. Hinuon sayon sultihon pero lisod buhaton.