Maypa makililimos kay nakakita

Usa ka higayon, si Hesus miingon: “Amahan, Ginoo sa Langit ug yuta, dalaygon Ka, kay gitago Mo kining mga butanga sa maalamon ug makinaadmanon, apan gipadayag sa yanong katawhan.” (Mat 11:25)

Pagkanindot nga pagpahinumdom alang kanatong tanan ning panahon, diin giatubang ta ang dakong kalisdnanan.

Makapaanod nato ngadto sa halawom nga pagpamalandong nganong miabot man kini sa atong kinabuhi ug nganong wala pa man kini molurang hangtod karon? Unya, ang tibuok kalibotan pa gyoy gipasinati. Ngano man?

Kini tungod kay ang mga materyal nga butang, salapi ug bahandi man ang giludhan kanunay sa mga makinaadmanon ug ang Ginoo nga maoy naghatag niining tanan, wala nila makita.

Dinhi lang sa atong nasud molutaw sa panagway ug batasan sa atong mga lider, kinsa ang ilang gipaka-Ginoo: salapi, o atong Magbubuhat? May pipila kanila, mipakatap og hulagway sa mga mantalaan nga misimba-luhod atubangan sa altar, apan padayong nagpaulipon sa mga buhat nga salawayon.

Ang binilyong salaping gitugyan kanila aron iapod-apod unta sa mga kabos, gihilabtan. Wala moabot ngadto sa kamot sa mga alaot kay gisurikbot sa mga nanagdumala nga kurakot.

Hinungdan, nga daghang hubo ug lago ang nagpakalimos na lamang intawon sa kadalanan.

Usa ka makililimos, miangkon nga ang pagpakilimos usa ka matang sa propesyon. Ug misyon kini nga gihatag sa Ginoo kaniya. Gani, malipayon siya diha sa iyang inadlaw nga pagpakilimos. Kay iyang nakit-an-nahimamat ang nagkalainlaing kinaiya sa tawo.

May desenteng dekorbata, paingon sa trabaho, nanampong sa ilong kay gibahoan niya. Miatras, milikay. Dunay babayeng miagi nga nagtulod og push cart nga puno sa mga grocery, kinsa miingon nga mobalik lang kay wala pay sensilyo nga ikatunol. Dinhay biyata, kinsa gikan sa simbahan, miihatag man tuod, pero maoy gipili ang kinagamyang sensilyo ug nangasaba pa.

Unya, kalit lang misiga iyang mata dihang may tibuok P100 nga nahulog sa iyang panudlanan.

Paghangad niya, usa ka tam-is pahiyom sa hamtong lalaki maoy misugat sa iyang panan-aw dungan ang kinasingkasing pagtimbaya-tanyag niyag kapuy-an, sinina ug pagkaon.

“Dihadiha, mihangad sa itaas ang makililimos ug miingon: “Lord, mission accomplished.

Nakaplagan ko ra gayod ang kinaiya sa tawo nga Kanimo nakapahimuot ug kaniya makapa-langit.

Salamat sa paghimo Mo nakong ilahang instrumento.