Sabot lalaki, sabot lingla

Sa pagsugod sa ika-18 nga Kongreso nagkasabot ang duha ka kontender sa pagka-Speaker sa Ubos Balay Balauranan nga pulos kaalyado ni Presidente Rodrigo Roa Duterte nga magbahin lang sa termino sa pagka-Speaker.

Sila si Taguig-Pateros Kongresman Allan Peter Cayetano ug Marinduque Kongresman Lord Velasco nagkasabot nga si Cayetano ang unang molingkod sa pagka-Speaker sa Ubos Bay Balauranan sulod sa 15 ka buwan nga mapopos ning buwan sa Septyembre 2020 ug mopuli kaniya si Velasco nga molingkod sa nahabilin nga 21 ka buwan. Kining maong kasabotan gisaksihan ni Presidente Duterte.

Apan dako ang posibilidad nga dili na madayon ang sabot lalaki tali sa duha ka mga kongresista human mipagawas og manipisto sa pagsuporta ang gitawag nga super majority kang House Speaker Allan Peter Cayetano. Gusto sa super majority nga ipabilin sa puwesto si Speaker Cayetano. Suportado usab sa minorya ang liderato ni Speaker Cayetano.

Tungod niini murag hanap na nga mahimong sunod nga Speaker sa Ubos Balay Balauranan si Kongresista Lord Velasco. Gani apil sa mipirma sa manipisto sa pagsuporta ni Cayetano ang duha ka dagkong haligi sa ilang partido.

Bisan sakit sa dughan mas maayong dili na lang ipamugos ni Velasco ang iyang ambisyon nga mahimong Speaker sa Ubos Balay Balauranan tungod kay hanap pa kini sa panas.

Si Velasco gibiyaan na sa mga pader nga iyang gisandigan, ang iyang mga suod nga anak sa Presidente nga sila si Pulong ug Inday Sarah.

Si Pulong nakit-an nga kuyog ni Speaker Cayetano sa usa ka dapit samtang si Inday Sarah nag-leave sa iyang trabaho ning panahon nga gikinahanglan kaayo ang iyang tingog aron ipamugos ang sabot lalaki ni Cayetano ug Velasco. Si Velasco nga usa ka politiko dili na makugang kun dili madayon ang sabot lalaki nila ni Cayetano tungod kay dili kini bag-o sa mga politiko. Sa mga politiko ang sabot lalaki, sabot lingla.