Diskriminasyon

Giablihan ni Cebu Governor Gwendolyn Garcia ang turismo sa lalawigan sa Sugbo sa tumong ug tuyo nga makatabang na kini sa hinayhinay nga pag gitib sa ekonomiya sa lalawigan.

Apan aron makontrolar ug maseguro nga masunod ang health protocol gikinahanglan nga morehistro sa opisina sa Kapitolyo ang mga buot modayo sa lalawigan.

Tuod man midayo ug midugok na sa mga lugar sa lalawigan sa Sugbo ang mga lokal ug langyaw nga mga turista.

Apan mipagawas og kamandoan si Gobernador Gwendolyn Garcia nga nagdili sa mga taga dakbayan sa Sugbo sa pagbisita sa mga dapit sa lalawigan sa Sugbo tungod sa pagtuo nga mao kini ang nakapasaka sa gidaghanon sa mga nagpositibo sa COVID-19 sa lalawigan sa Sugbo.

Wala mag inusara ang gobernadora sa pagdili sa mga taga dakbayan sa Sugbo sa pagbisita sa lalawigan. Ang dakbayan sa Lapu-lapu midili usab sa mga taga dili taga Lapu-lapu sa pagpangaligo sa dagat sa ilang dapit sa tingoha nga mapanalipdan sa coronavirus disease ang nahisgotang dakbayan.

Diskriminasyon ang gihimo sa gobernadora sa mga taga dakbayan sa Sugbo. Kun dili buot sa gobernadora nga modaghan ang COVID-19 sa lalawigan sa Sugbo, nganong iya  man kining giablihan para sa mga turista? Kun imong huna-hunaon, ang mga taga dakbayan sa Sugbo lang ba nga turista ang nagdala og virus?

Gawas niini, ang mga turista nga modayo sa lalawigan sa Sugbo magparehistro pa sa opisina sa Kapitolyo ug dili pasudlon sa lugar sa lalawigan nga ilang adtoan kun dili moagi sa opisina sa kapitolyo. Busa kontrolado na nila ang mga modayo nga turista.

Si Mayor Edgardo Labella nga gipangayoan sa iyang panahom sa gihimo sa gobernadora igo lang miawhag sa mga taga dakbayan sa Sugbo sa dili pagbisita sa lalawigan aron lang modayo tungod kay wala kini kinahanglana.