SAP anomaly

Miresulta na gyud, may mga barangay kapitan na dinhi sa Cebu nga gipailalum sa preventive suspension sulod s unom ka buwan kay giimbestigar tungod kay dunay mga lumolupyo sa ilang barangay nga bisan og kwartahan ilang gipahatagan og Social Amelioration Program (SAP) funds.

Sigurado ko nga may lain pa nga mga barangay kapitan nga suspensohon sa Department of the Interior and Local Government (DILG) sa umaabot nga mga adlaw kay ang kapolisan padayon pa nga naghimo og imbestigasyon sa daghang reklamo.

Dili lang nako ibutyag dinhi ang ilang mga ngalan, apan sigurado ko nga nasayod na mo kon kinsa sila. Dunay duha dinhi sa Dakbayan sa Sugbo, dunay taga lungsod sa Minglanilla ug Carmen. Para nako, angay pa gani nga taktakon sa serbisyo kining maong mga kapitan.

Daghan kaayong mga report nga miabot sa DSWD, nga dunay mga kwartahan nga nakadawat og SAP funds nga tag P6,000. Ang DSWD misalig ra gyud sa mga kapitan nga maoy mohatag og lista kinsa ang hatagan og SAP funds.

Ang kapitan mipili og ilang mga sakop nga maoy moila kinsa sa ilang barangay nga pahatagan nila sa DSWD og hinabang salapi. Kining maong mga empleyado sa barangay maoy angay’ng latuson, kay nagpataka lang sa pagpanglista.

May mga kawani sa barangay nga gisaligan sa kapitan nga maoy tiglista sa mga qualified beneficiaries, mipahimulos pud ug way kauwaw nga miapil sa ila mismong mga ngalan diha sa listahan.

Para nako, kon imbestigahon ug suspensohon man ang mga kapitan, kining mao nga mga empleyado, angay usab nga pasakaan og kaso, gawas kon “um-omon” lang sa kapitan ug dili itug-an ang kalambigitan sa iyang sinugo.

Kinahanglang tinud-on gyud sa DILG ang pagsilot niining mao nga mga opisyal sa barangay, kay kon dili nila tinud-on, dili na motoo kanila ang katawhan.

* * *

Dunay ubang kapitan nga giimbestigar kay imbes tag P6,000 ang ihatag ngadto sa usa ka beneficiary, sus tag P3,000 ra man ang gipanghatag kay gibahin kuno ang kantidad sa duha ka tawo aron daghan ang mahatagan.

Maayo baya ang tumong sa kapitan kay gamay ra man ang mahatagan kon tag P6,000 ang ipanghatag, apan kon tag P3,000 mahimo nga madoble ang gidaghanon sa mahatagan.

Apan matud sa DILG nga kay nagbuot-buot man ang maong mga opisyal sa barangay nga wa man kini itugot, nakahimo sila og salaod ug angay silang silotan.

Ang akong ig-agaw nga nagpuyo sa lungsod sa Tuburan, mipahibawo nako nga P3,000 ra ang iyang nadawat. Apan dili kaayo ko ganahan nga moatiman niining isyu sa SAP kay pwerte kasamok, ug bahala na ang kapolisan nga maoy moimbestigar niini.