Labella ug Dino

Anam-anam na gyud nga nahanaw ang kahadlok sa katawhan kabahin sa Coronavirus Disease, ilabi na dinhi sa siyudad sa Sugbo.

Mangutana mo og ngano? Mora’g wa na kaayo mahadlok ang mga tawo kay panagsa na lang sila makadungog sa mga updates sa COVID-19 dinhi sa siyudad.

Labaw pa nga gipakita karon sa statistics sa Department of Health (DOH) nga mikunhod kuno pag-ayo ang mga kaso sa COVID-19, ilabi na ang gidaghanon sa mga nangamatay.

Nindot kaayo kay akong nakita nga kadaghanan sa mga tawo nga migawas sa ilang kabalayan ug miadto sa publikong mga dapit, nagsul-ob gyud og face mask.

Ang uban gani, wa makuntento nga magsul-ob lang og facemask, namalit gyud sila og plastic face shield aron nga matabonan ang ilang nawong. Makaingon tingali ta nga usa ni sa nakaingon nga mikunhod ang mga kaso sa COVID-19.

Lauman na lang nato nga karong Septiyembre 1, madeklarar na nga Modified General Community Quarantine (MGCQ) ang Dakbayan sa Sugbo aron nga makapangabli na ang ubang mga negosyo.

* * *

Angay bitaw nato nga daygon si Mayor Edgardo Labella kay dihang gipadala dinhi sa siyudad si Roy Cimatu nga gitugyanan ni Presidente Duterte pagpangulo sa kampanya sa COVID-19, wa magtagad ang mayor sa mga intriga.

May miingon nga giyatakan na ang katungod ni Mayor Labella ug si Cimatu na ang nagbuot sa kalihokan sa siyudad.

Apan si Mayor Labella wa magtagad niini ug mitrabaho lang gyud siya pag-ayo. Kay kon hakog pa sa gahum si Labella, sigurado nga kubiton niya ang mga intriga ug makig-away siya ni Cimatu.

Nalipay ko kay tungod sa kamapahiubsanon ni Labella, nagpabilin ang maayong relasyon nila ni Cimatu. Saludo ko ni Mayor Labella kay dili siya palaaway.

Nakahinumdom ko nga mao usab diay kini ang gihimo ni Presidential Assistant for the Visayas Michael Lloyd Dino.

Nakabantay ba mo nga sa milabay’ng mga adlaw nagpakahilom na lang si Dino?

Dunay mga tawo, labi na kadtong mga kaalyado sa kanhi mayor, miatake pag-ayo kaniya ug miawhag pa gani nga siya palagputon sa iyang pwesto, kay kuno nanghilabot na si Dino sa kalihokan sa siyudad.

Apan wa gyud motubag si Dino niini ug nagpadayon sa iyang mga gimbuhaton, ilabi na ang hilom nga pakig-coordinate sa Regional Inter-Agency Task Force (RIATF) aron nga masumpo na ang COVID-19 dinhi sa ato.

Gidaot nila pag-ayo si Dino ug giawhag si Presidente Duterte nga palagputon sa serbisyo ang iyang presidential assistant, apan wa maminaw kanila si Duterte.

Sa laktod, nindot gyud nga dili nato ipasuwabi ang pagka palaaway ug maayo kining leksyion sa ubang mga opisyal nga sundon nila ang gihimo ni Labella ug Dino.