Di na gyud masulbad

Naila kaniadto ang administrasyon ni Presidente Rodrigo Duterte sa paggukod niadtong mga nalambigit sa kurapsiyon sa kagamhanan. Gani daghan ang ni-resigned o iyang gipalagpot sa katungdanan gumikan sa nagkadaiyang anomaliya sa kagamhanan.

Usa sa rason ngano nga midaug si Duterte kaniadtong 2016 presidential elections mao ang iyang dakong saad nga sumpoon ug limpyohan ang mga ahensiya sa gobiyerno gikan sa kurapsiyon ug ubang kahiwian.

Kini gawas sa nag-una niyang krusada nga mao ang pagpukan sa negosyo sa ilegal nga druga nga dugay ra nga mihasi sa nasud. Tuod man, sulod sa pipila ka katuigan, miarangkada gayud ang iyang kampanya batok sa druga, corruption ug ubang kahiwian.

Daghan ang mga opisyal ang nasilhig gayud gikan sa puwesto tungod sa mga kahiwian. Ug mikinto gayud kadtong mga anaa sa government service kay lagi mag-ayo og masipa gikan sa katungdanan bisan sa gamay lamang nga pagpangawkaw.

Apan taliwala sa gihingusgang kampanya batok sa kurapsiyon ning kasamtangang administrasyon, padayon nga wala masumpo kining maong klase sa kahiwian sa nagkalainlaing ahensiya sa kagamhanan.

Gani, niining bag-o pa lamang, maayong pagkabisto sa bilyones nga kantidad sa pagpangawkaw diha sa Philippine Health Insurance Corporation o PhilHealth nga gikalambigitan sa pipila ka opisyales niini.

Giingong mokabat sa P15 bilyones ang nasuyop sa corrupt nga mga opisyales sa maong buhatan, matud pa sa usa ka whistleblower nga mi-testify atol sa usa ka imbestigasyon nga gipahigayon sa Senado sa niaging semana.

Gani, matud pa sa Presidential Anti-Corruption Commission, mokabat sa P153 bilyones ang nawala gikan sa PhilHealth tungod sa mga kahiwian sukad pa niadtong 2013. Panahon pa diay kini sa nangaging administrasyon.

Pagkaanugon sa maong kantidad nga giwaldas lamang sa mga balhiboon og kamot diha sa maong buhatan.

Sa kadako niini, milyones na unta ka mga Pilipinhon ang matabangan, ilabina niadtong anaa sa labing ubos nga hut-ong sa katilingban.

Ang PhilHealth usa lamang sa mga ahensiya sa kagamhanan diin naghitak ang corruption ug ubang klase sa kahiwian. Sa ka seryoso niining maong suliran, dili na gayud kini masulbad pa. Bisan kon si kinsa pa ang modumala sa nasud.