Daw lumba sa ba-o ug suso

Namahayag si MCCI President Steven Yu nga ang bahad sa Presidente pagpasira sa Globe ug PLDT kon dili mapauswag ang ilang serbisyo sa internet, makaaghat og kompetisyon ug makaayo sa mga konsumidor.  Andam ang Globe mosanong sa panawagan sa Presidente apan mipasidaan sila daan nga daghang hagit ang labangon una nila mapauswag ang ilang serbisyo.  Mora’g mag-antos pa gyud ang konsumidor, kay inay molihok dayon, giuna man paggambalay ang rason ngano’ng dili sila makatuman sa kamanduan.  Ang internet service sa Globe ug PLDT, daw lumba sa ba-ó ug susô, diin pilde-gana ang kriterya.  Baya na lang!

 Dili makaon sa irô

Segun sa balita, nakaplagan sa mga frontliners ang daghang iro nga gisulod sa sako didto sa Barangay 20 Isla Puting Bato sa Tondo, Manila. Ang maong mga iro giingon nga padung na ibaligya sa nagkalain-laing merkado.  Dayag kaayo nga ang karne sa iro himoong pagkaon sa tawo, maoy hinungdan nga gipamaligya kini; apan ang batasan ug taras sa mga tawo nga naghimo sa maong niluog nga buhat maingon ta nga “dili gayod makaon bisan sa iro”.  Pagkalampingasan!

“Dili bisyo” ang tigbakay

Upat ka konsehal sa munisipyo ug tulo ka mga barangay kapitan ang mag-atubang og kaso nga kalapasan sa Akta Republika 11332 ug sa Bayanihan Act tungod sa ilang kalambigitan sa illegal nga sugal nga tigbakay.  Bisan adunay balaod nga nagdili sa tigbakay, manugal gayod ang tawo tungod kay matud pa, “dili bisyo ang pagpanugal kon dili pagpadayag kini sa atong pagkatawhanon”. Agi’g suporta, may panultihon usab nga nagkanayon, “Ang tawo wala manugal aron modaug. Misugal ang tawo karon aron makapanugal na usab siya sa sunod adlaw”.  Madahaan!

 Maayo pa ang wakwak

Gikwestiyon karon sa mga awtoridad ang kanhi mga empleyado sa usa ka gasoline station diin nahitabo ang pagpanulis nga mikalas usab sa kinabuhi sa nagbantay nga security guard. Gihimo kini sa kapolisan gumikan sa kasayoran nga ang maong mga empleyado nakahibalo sa kumbinasyon sa vault nga gisudlan sa halin.  Giabli ang vault dili pinaagi sa pwersa kon dili ginamit ang kumbinasyon.  Tuaw pa sa akong silingan, “Maayo pa lage maka-empleyado og Wakwak kay sa kawatan.  At least ang wakwak dili mounay.”  Hala no!

 Gihimo’ng basurahan

Ang grupo nga gitawag og The Ecowaste Coalition mipadayag sa ilang kabalaka sa giingon nga pasagad nga paglabay sa mga ginamit na nga face mask kay matud pa sa grupo makahatag kini og kakuyaw sa ubang tawo nga matakdan sa coronavirus ingon man makapadaghan sa basura’ng  plastik nga mahimong makadaut sa kadagatan.  Tungod sa kayam-angan sa tawo, diin wala kita’y puas sa paghugaw-hugaw sa kalibutan, moabot gayod ang panahon nga mahisama na lang kita sa ilaga nga nagpuyo sulod sa dakong basurahan. Fezteleern!