Ka sayang sa CCMC

Adunay ad hoc committee ang gitukod sa konseho sa siyudad sa Sugbo alang sa dali nga kahumanan sa katukoran sa bag-ong edepisyo sa Cebu City Medical Center, ang nag-inusarang hospital alang sa masa dinhi sa dakbayan.

Maayo kini nga balita, ilabina alang niadtong mga kabus. Ug nagpasabot kini nga hayag na ang paningkamot sa padayong konstruksiyon sa maong hospital aron nga sa katapusan kapahimuslan kini sa kinabag-an sa lumulupyo ning dakbayan.

Basi sa taho sa The Freeman kagahapon, ang maong komitiba maoy mangulo sa planning, design ug konstruksiyon sa maong city hospital. Mismong si Rama maoy modumala niini isip maoy nag-unang proponent sa maong proyekto.

Wala na magamit ang maong city hospital human kini gitay-og sa makusog nga linog kaniadtong 2013. Sukad niadtong 2015, gisugdan sa administrasyon ni kanhi mayor ug karon Bise Mayor Michael Rama ang katukoran niini.

Miarangkada na unta kini ug mitubo og pipila ka andana. Apan ang kakulang sa pondo panahon sa administrasyon ni kanhi mayor Rama maoy nakapaundang sa konstruksiyon sa maong hospital.

Ang nakapait mao nga, sa panahon ni kanhi mayor Tomas Osmeña, kinsa mipuli kang Rama, wala himoa nga prayoridad ang kahumanan sa konstruksiyon niini. Hinungdan nga pabiling nagyaka ang maong proyekto.

Kon nahuman pa unta kini sa panahon ni Osmeña, daghan na unta ang makapahimulos sa maong hospital karon, ilabina niadtong labing kabus sa katilingban. Ug walay kwestiyon nga dako unta kini nga legasiya sa administrasyon sa kanhi mayor.

Apan hangtud karon pabiling nagyaka ang maong proyekto ug wala kapahimusli. Kon nag-operate pa lamang kini karon, dako unta kini og ikatabang sa atong kampanya batok sa coronavirus disease pandemic.