Wali ni Fr. Ciano pangpamilya

Sukad nga gipangsirad-an ang mga simbahan ni COVID-19 niadtong unang enhancement community quarantine (ECQ 1) hangtod na-general community quaranteine (GCQ), unya nabalik sa ECQ (2) ug karon na-modified ECQ na ang Cebu City, kutob na lang intawon akong pagsimba sa online nga misa kada adlaw.

Sagad nakong masimbahan online mao ang mga misa ni Fr. Ciano Ubod, kura paroko sa San Vicente Ferrer Parish Church, Liloan, Cebu.

Matag adlaw i-post iyang misa sa You Tube, diin sagolan man tuod og pakatawa iyang homiliya, apan tugob sa kamaundanon ang matag pisik sa mga pagtulon-an nga moulukiot gyod pagsulod sa imong kasingkasing.

Kada misa ni Fr. Ciano, pag-abot sa homiliya, paborito niyang mahisgotan ang relasiyon sa matag miyembro sa pamilya.

Mabuhian dayon sa iyang baba kining mga pangutanaha:

“Unya, ikaw, misis, kon makit-an nimo imong banang midulog sa inyong silingan, dili ka masuko? Higugmaon ba gihapon nimo siya?

Unyag masakpan nimong nag-agbayay sa dalan imong mister ug iyang kerida, panggaon ug mahalon ba gihapon nimo siya, hasta iyang kerida?

Kay kon dili ka makahimo niini, unya mangaway o makigbulag na hinuon, aw, nakasala ka na.

Kay ang sugo sa Ginoo nag-ingon: ‘Love your enemy.

Busa, mas maayo nga bisag gipasakitan ka na sa imong bana, kinahanglan imo gihapon siyang panggaon, atimanon ug pahiyoman dungan ang pag-ingon: “Darling, you know, nothing’s gonna change my love for you.”

Moabot ang panahon, nga tungod sa imong endless love, biyaan sa imong bana tanang bisyo ug magbag-o na siya sa iyang kinabuhi.

Ug ikalipay kini sa Ginoo. Sanglit, sa imong pag-antos, siya na-evangelized ug dili kay ikaw lang ang ma-Langit. Kondili, hasta sab imong bana.”

Sa mga bana, gilabay sab ni Fr. Ciano ang maong mga parehang pangutana ug paghatag sa mga diyosnong lamdag.

Hasta mga anak, gigiyahan sab sa iyang mga wali unsa ang angay buhaton aron malipay ilang mga ginikanan.

Ug sa mga ginikanan, iyang gipasabot ang paghatag og unlimited love forever ngadto sa mga anak, mga badlongon man o buotan.

Tipik lamang kini sa mga bulawanong wali ni Fr. Ciano.

Nga kon tumanon lang sa tanan, katahom kaha gakson kining kalibotan nga atong gipuy-an karon.