Angayan ba mauwaw si Mayor Labella?

Gilat-an sa mga pagbasol ug pagsaway si Mayor Edgardo Labella tungod sa nahitabo sa dakbayan sa Sugbo nga tungod sa kadaghan sa kaso sa COVID-19 hinungdan nga mi-take over ang national government, gipadala na ni Presidente Duterte si Secretary Roy Cimatu nga mosulbad sa problema.

Apan ang mga nanaway ug mibasol sa mayor duna bay nahimo? Asa man sila sukad sa unang adlaw nga mitumaw si COVID-19 hangtod nga misanay ug milipang nga mitakboy na sa daghang mga Sugboanon? Unsa man ang ilang natampo sa pagsulbad sa problema? Nakahatag ba sila og bisan usa ka momho sa kan-on sa gipang gutom? Nakahatag ba sila og vitamins o tambal sa  mga nag-positive?

Tinuod duna siguroy sipyat ang liderato ni Labella sa pag-manage niini sa COVID-19 pero angayan pud nato sabton nga first time kini nasinati sa nasud o bisan sa kalibotan maong nangapa gyud unsay pagahimoon. Dili sa pagdapig sa mayor kay mismo ako nakakita man sad sa mga kakuwangan sa pagresponde sa problema. Apan kon buksan nato ang atong panghunahuna, siguro makita nato kon unsa pud ang gihimo sa mayor.

Seguro huyang ang iyang kamot sa pagdesiplina sa mga gahig ulo kay mopatigbabaw man gyud ang iyang malumo nga kasingkasing sa mga tawo kay mopatigbabaw man gyud ang iyang inamahan nga pagdala sa mga tawo.

Sama sa usa ka amahan nga adunay anak nga adik nga kapila gyud masulod sa rehab tungod kay gahi kaayo og ulo pero dili mosurender ang amahan hangtod mapasunod ang anak, ingon usab niini ang nahitabo sa dakbayan nga usahay kutob ra sa baba ang kaisog apan magpasulabi ang kalumo sa kasing kasing, sala ba diay nga mobati og kaluoy? Sa kagrabe sa sitwasyon karon gikinahanglan ipadaplin ang kalumo sa kasingkasing kay dili naman madala ang kagahi sa ulo sa mga tawo nga gikinahanglan na og dukol aron motuo.

Siguro ang sala sa mayor ang iyang pagkamaayong tawo, since day one makita nato ang mayor nga mangunay sa pag-atiman sa isyu sa COVID-19 bisan gani maglain ang iyang lawas kay edaran naman pud lagi pero magpakalig-on gihapon siya aron padayon nga moserbisyo. Ok ra man siguro mosaway kay naa man gyuy angayan sawayon lagi sa pagdumala pero unta mo-contribute pud sila kon unsa ang ilang matabang.

Dili panahon karon sa pagpanaway kon dili ang pagtinabangay aron makahaw-as kita sa dakong problema nga giatubang. Naay moingon nga dakong kauwawan nga gikinahanglan pa moanhi ang national official pagsolbad sa problema. Alang nako, dili man siguro angayan mauwaw ang mayor kay gihimo niya ang tanan, ang angayan niyang ikauwaw ang kagahi sa ulo sa mga tawo nga dili mopatuo.