EDITORYAL - Pabor bugti sa pabor
Samtang nakatutok ang tanan sa novel coronavirus disease (COVID-19) ang China padayon sa mga agresibo niining pagpalapad sa teritoryo ilabi na sa West Philippine Sea.
Sa paglingkod ni Duterte niadtong 2016, agresibo niyang gipaila ang iyang “independent foreign policy,” apan nakigsuod siya sa China ug gipabati niya sa tanan ang iyang kayugot sa Amerika, mga tradisyonal nga mga higalang nasud ug mga organisasyon dinhi sa Pilipinas ug sa kalibotan.
Ang iyang rason, mga hilabtanon sila sa mga polisiya sa iyang administrasyon ilabi na sa iyang agresibong war on drugs.
Apan nganong nakigsuod siya sa China? Sa bag-o pang milingkod si Duterte nakita kung giunsa siya paghangop ni Xi Jinping.
Ang duha ka nasud namirma og mga kasabotan para a ekonomiya ug imprastraktura. Ang tuyo ni Duterte nga mobubo ang China og puhonan dinhi sa Pilipinas ilabi na didto sa Mindanao.
Mao tingaling gipadaplin niya ang 2016 Arbitral Ruling nga nag-ingong ang Scarborough Shoal sa WPS iya sa Pilipinas. Apan daan namang wala tahora sa China ang ruling, dili ba?
Kun duna silay gituman, gipautang kini nga mga imprastraktura ubos sa build, build, build projects ni Duterte apan adunay dakong interes.
Sumala pa sa usa ka artikulo sa The Diplomat, ang suway nga pagpaputol ni Duterte sa Visiting Forces Agreement tali sa Pilipinas ug Amerika usa sa iyang mga pamaagi pagdani sa China dinhi.
Sayod ang tanan nga ang presensya sa US dinhi sa Pilipinas babag sa ambisyon sa China sa Asya Pasipiko.
Apan duha nalang ka tuig ang termino ni Duterte, wa pa gihapon modugo ang China sa gusto niyang mahitabo. Gamay ra kaayo ang tan-aw sa China kang Duterte?
Mao ba kaha ni ang rason nganong karong bag-o dili na gusto ni Duterte nga ipapadayon pagbasura ang VFA? Tungod ba gyud kaha sa politikanhong kausaban sa kalibotan ug kining hulga sa COVID-19?
Posible ba nga sa mosunod nga mga adlaw modistansiya si Duterte sa China tungod kay gibalewala ra ang mga pabor nga iyang gihatag kanila?
- Latest