EDITORYAL - Bag-ong mananakop

Karong adlawa, saulogon sa Pilipinas ang kaugalingnan niini, o Araw ng Kalayaan, taliwala niining mga pagsuway sa kalig-on sa mga Pilipino isip usa ka nasyon.

Ang mga Filipino nakaangkon og kagawasan gikan sa mga mananakop nga ubang nasyon 122 ka tuig na ang nakalabay.

Ang pagtimaan karong tuiga nagdala sa temang “Kalayaan 2020: Tungo sa Bansang Malaya Nagtutulongan at Ligtas”agi og pahaom sa panahon.

Wa nay langyaw nga nangulipon sa mga Pilipino karon, apan gihamok kini og daghan ug bag-ong matang sa mananakop, dili lang dinhi sa sulod kondili gikan sab sa gawas.

Ang hulagway niining bag-ong mananakop mao ang ekonomiya, politika, soberiniya, seguridad ug kining hulga sa panglawas sa populasyon niini.

Apan dunay duha ka mananakop nga wa pa kaayo masabti apan mihamok og maayo karon sa nasud.

Kining hulga sa COVID19 ug kining hulga sa soberniya sa nasud tungod sa gihimo sa China diha sa West Philippine Sea.

Dawaton man o dili sa gobiyerno, nakumpromiso ang seguridad sa nasud tungod sa pagilog sa gibuhat sa China sa WPS. Naapektahan sab ang ekonomiya tungod sa Wuhan virus o novel coronavirus disease (COVID19) gikan gihapon sa China.

Sa politika, padayon ang init nga bangiay sa mga opisyales tungod kay umaabot na ang sunod nga piniliay, mao nga ang nag antos mao ang katawhan.

Anaa sab ang gihulagway nga hulga sa kagawasan sa pagpadayag ug pagpahilom sa mga tawong moreklamo batok sa mga kahiwian sa gobiyerno o mga opisyales niini.

Kining kontrobersiyal nga Anti-Terror Bill  gikabalak-an sa mga human rights groups nga gamitong instrumento aron ipiton ang mga kritiko sa naglingkod nga administrasyon.

Hinuon dili unta kining mga naghamok nga pagsuway sa katawhang Pilipinhon maoy magdiktar sa kahulogan sa atong pagka Pilipino.

Tungod kay sa wa pa kining maong mga problemaha, naa nay gitawag nga mga Pilipino dinhing bahina sa kalibotan.

Ang kagawasan dili lamang palingkawas gikan sa talikala sa pagkaulipon, kondili, ang determinasyon sa matag Pilipino nga taakon ang hustong direksyon sa kung unsay ikaayo niini.

Ang inutok nga paggamit aning mga pagsuway aron gamiton kining patongan aron mas malayo pa ang makita sa mga mata didto sa unahan para sa kaugmaon sa nasud.