GCQ

Human sa kalibog unsa gyuy mamahimong estado sa dakbayan sa Sugbo sugod karong Lunes, giklaro ni Mayor Edgardo Labella nga general community quarantine (GCQ) maoy ipatuman ug dili modified enhanced community quarantine nga maoy unang rekomendasyon sa Inter-Agency Task Force on Emerging Diseases.

Kini human giaprobahan sa IATF ang hangyo sa mayor nga ipaubos sa GCQ ang dakbayan sugod karong Hunyo 1.

Nitumaw ang lapad nga kalibog sa miaging adlaw human managlagi ang pahibawo nga giluwatan sa IATF ug ni Presidente Rodrigo Duterte.

Ang IATF resolution number 40 unang mipaubos sa syudad sa Sugbo sa MECQ apan si Duterte mianunsiyo nga MGCQ maoy ipatuman.

Gawas sa kalibog, nitumaw sab ang lantugi husto ba o dili nga molargo og GCQ ang dakbayan gikan sa ECQ taliwa sa nagpadayon pa nga pagsaka sa mga kaso sa COVID-19.

Dunay uban nga buot nga moagi una og modified ECQ sa dili pa mag-GCQ. Sa pikas bahin daghan sab ang buot nga GCQ, labi pa kadtong mga buot na mobalik sa trabaho.

Argumento sa mga supak sa GCQ mao nga dilikado pa ang sitwasyon ug piligro nga mosaka hinuon og maayo ang kaso kon molugak ang mga lagda.

Apan ang mga buot og GCQ miingon nga mamatay sa kagutom ang ilang pamilya ug dili sa COVID kun lugwayan pa ang istrikto nga mga lagda.

Pulos dunay punto ang nagkasungi nga mga baruganan. Apan dili maayong ang kahadlok maoy mopasuwabi.

Ang mga eksperto sa panglawas miingon nga ang kagaw magpabilin ug dili na mahanaw. Busa ang angayang buhatan sa katawhan mao ang pag-amping aron malikayan nga mataptan niini.

Apan wala ni magpasabot nga hangtud sa hangtud ta nga motago diha sa atong mga pinuy-anan ug pasagdan nga mounlod pag-ayo ang atong ekonomiya.

Igo na ang duha ka buwan nga pagtuon ug pagpaniid sa kinaiya sa sakit.

Ug basi sa datus, samtang dunay ubay-ubay nga nataptan apan dili ingon niana ka bangis ang maong sakit.

Gani ang uban nga nagpositibo sa test wala gyuy gipamati sa ilang lawas.

Ang importante nga mag-amping ug sundon ang mga pahimangno sa mga doktor.

Padayonon ang social distancing ug likayan ang mga kalihukan nga way kapuslanan.

Atong dawaton ang kamatuoran nga  wala na ang naandan nga bisan og magbuntag ta og laroy-laroy mahimo natong buhaton.