EDITORYAL - Mas arang-arang ang Cebu City kontra COVID-19

Nahimong sumsoman sa social media ang pagkabutang sa Cebu City sa numero uno sa dunay kinadaghanang mga positibo sa novel coronavirus disease (COVID-19) sa tibuok nasud nga kaniadto gihuptan sa Quezon City.

Apan dili husto nga hukman ang taga Cebu City nga mga gahi og ulo tungod lang sa gidaghanon sa mga nagpositibo.

Kun tuohan sa statistics o pagtandi sa duha ka siyudad nga migawas sa mga balita, mas arang-arang ang mga nahimo sa Cebu City ubos sa pamunoan ni Mayor Edgardo Labella atol enhanced community quarantine.

Base sa datos nga migawas niadtong miaging adlaw, kun itandi ang duha ka siyudad, ang Cebu City nakapaubos sa 10,376 ka tawo sa mass rapid testing, ang Quezon City 3,000 ra ka tawo. Ang Cebu City duna kini 1,571 ka positibo sa COVID-19 samtang ang Quezon City 1,558.

Kun ang mga numero ray tan-awon, mas daghan ang nataptan og COVID-19 sa Cebu City apan kun tan-awon ang gidaghanon sa gipaubos sa testing ug sa porsiyento sa gidaghanon sa mga positibo, mas arang-arang ang Cebu City tungod kay naa lang sa 15 porsiyento sa tanang gi-test ang positibo samtang ang Quezon City , 50 porsiyento gyud ang nataptan o katunga sa tanang gi-test.

Ang death rate o nangamatay sa Cebu City 0.75 percent lang samtang 7.94 percent ang sa Quezon City. Kun sa populasyon ang hisgutan, lapas lang gamay og usa ka milyon ang Cebu City samtang 3.2 milyones ang Quezon City.

Busa samtang makaguol tan-awon ang gidaghanon sa positibo, maayo sab tingaling tan-awon ang paningkamot nga gihimo ni Labella ug sa siyudad pagpugong sa pagkatap sa maong sakit.

Apan dili gihapon maayong mokompiyansa karon nga gipaubos nalang ang Cebu City sa Modified Enhanced Community Quarantine (MECQ) gikan sa ECQ sugod Mayo 16 hangtud Mayo 31 tungod kay anaa pa gihapon kining maong virus diha sa populasyon.

Kutob sa mahimo ipadayon gyud ang pag-amping sama sa gituman ubos sa ECQ,  stay at home lang gihapon kun dili importante ang katuyoan sa gawas.