Estriktohon nato uy!

Tungod sa paspas kaayo nga pagsaka sa gidaghanon sa mga nataptan og Coronavirus Disease dinhi sa Dakbayan sa Sugbo, mas maayong pahugtan pa gayud ang pagkontrolar nga way makasuroy sa publiko ug higpitan ang pagpatuman sa physical distancing.

Para kanako, kon itugot gud nga manggawas ang mga tawo ug mag-abot aron magsultihanay, mosulbong gyud pag-ayo ang gidaghanon sa matakboyan sa Coronavirus Disease ug lisud na kaayo nga kini makontrolar sa kagamhanan.

Gitan-aw nako ang mga dapit nga dunay daghan kaayong natakboyan og COVID-19, ug akong nasuta nga anaa kini mahimutang sa mga dapit nga nagdasok ang kabalayan. Unsaon, ang mga opisyal sa kabarangayan ug ang kapolisan wa man  makapugong sa mga tawo nga nanggawas sa kabalayan ug magpundok aron magtabi.

Makita man kini sa hulagway sama diha sa Sitio Alaska, Mambaling; ingon man sa Sitio Negative sa Barangay Caretta, ug bisan na sa Sitio Callejon, Labangon, nga nagpunsisok ang mga tawo nga daghan ang wa mag-mask.

Gani, napanglantawan man nako nga sa umaabot nga mga adlaw, mosaka pa gyud ang gidaghanon sa mga natakboyan sa COVID-19 kay gibaliwa sa katawhan ang physical distancing sa pagpaninguha nga makakuha sila og P6,000 nga Social Amelioration Program (SAP) cash assistance.

* * *

Ang mga kawani sa kabarangayan nga gisaligan sa ilang mga kapitan aron moasister sa taga-DSWD pag-ila kon kinsa ang hatagan og SAP, maoy angay’ng basolon kon wa makadawat kadtong mga pobre gyud.

Balikon nako nga ang gitahasan sa mga kapitan nga moabag sa DSWD nakaila kon kinsa ang mga pobre gyud diha sa matag sitio nga angay’ng tabangan sa kagamhanan.

Apan unsaon, dunay uban kanila nga gipalabi ang ilang mga suod nga higala ug mga paryente bisan og dili unta kini angay nga hatagan og tabang kay dili sila maoy labing pobre.

Tungod sa pagpasagad sa maong mga kawani sa barangay, namilegro karon nga mag-atubang og problema ang mga kapitan kay tiaw mo, dunay apil sa mga lista nga patay na, ug ang uban mga kwartahan?

Malipay ko kon tinud-on ang giingon nga bawion ang kuwarta nga gihatag sa mga “unqualified” unya pasakaan og kaso ang mga opisyal nga maoy nagpalista kanila.

Motuo ko sa baruganan sa DSWD nga wa sila makaila sa mga tawo, ug nagsalig ra gyud sila sa “endorsement” gikan sa mga kapitan, nga gibasi usab sa gilista sa ilang mga gisaligang kawani sa kabarangayan.

Angay sila nga prisohon ug yam-iran sa katawhan.