Wanted COVID-19!

Sa padayon nga pagsaka sa gidaghanon niadto’ng positibo sa Covid-19 gikinahanglan nga adunay himoon dili lang ang gobierno. Kitang tanan kinahanglan makighiusa ug makigtambayayong alang sa atong kaluwasan gikan sa gikahadlokan nga kagaw.

Ang dakbayan sa Sugbo ang epicenter sa coronavirus diin nakatala og labing daghan nga positibo diin miabot na sa dul-an 900 ang nataptan base sa record niadtong Sabado ug nagasaka pa kini kada adlaw.

Ang dakbayan sa Lapu-Lapu ug Mandaue ginagmay man apan kada adlaw usab misaka ang ang kaso sa Covid-19.

Nagkaduol na ang Mayo 15 nga gilatid sa kagamhanan nga ipaubos ang protocol gikan sa Enhanced Community Quarantine ngadto sa General Community Quarantine.

Dili kaha mosamot ka daghan ang matakboyan sa kagaw kon moluag kita sa quarantine protocol? Karon gani nga naa pa kita aa ECQ daghan pa man gani og ulo nga  mosupak, ayha na kaha kon mag GCQ na kita?

Aron maseguro nga haum ug angayan na ba nga ibutang sa modified community quarantine, nahimugso ang Project Balik Buhay PBB nga gipasiugdahan sa Office of the Presidential Assistance for the Visayas pinangulohan ni Secretary Michael Dino.

Kauban ang Department of Health ug ang mga lokal nga kagamhanan sa tulo ka mga dakbayan, Cebu City, Lapu-Lapu City ug Mandaue City uban sa pakig-alayon sa mga pribadong sektor sa pagpahigayon og strategic mass testing.

Karong adlawa sugdan ang massive testing sa mga baranggay sa tulo ka syudad aron masayran ang tinuod nga estado o gidaghanon sa mga tawo nga adunay virus.

Ang Program Balik Buhay usa ka pamaagi sa inanay nga pagpahibalik sa semi normal nga sitwasyon pinasikad sa calibrated, scientific ug data or evidence based transition sa ecq ngadto sa gcq nga gitarget karong Mayo 21 sa tulo ka mga dakbayan.

Dili lang butikaw butikaw ang pagpangita sa virus kon dili data driven pinaagi sa massive testing.

Kining strategic testing naglangkob sa 10% sa total number sa households kada barangay sa matag syudad.

Base sa  data gikan sa  City Health Departments sa tulo ka mga syudad mosumada og 46,896 individuals ang mapaubos sa mass testing.

Usa lang ang katuyoan niini nga matultolan ang virus ug malahi ang mga nataptan ug dili na makatakod pa sa uban. Walay angayan nga kahadlokan ang mga tawo kay ang FDA-approved Rapid Testing Kit ang gamiton dili kadtong swabbing nga kulitogon ang ilong. Dili usab house to house kondili sa usa ka dapit nga gilatid sa mga barangay himoon.

Kong mao kini ang pamaagi nga mapugngan ang virus ug makabalik na ta sa atong panginabuhi, nan ato kining sundon. Suportahan nato ang PBB nga susama sa usa ka manhunt operation batok sa Covid-19.