Virus sa gamay’g utok mas kuyaw

Gawas sa coronavirus, ang gikahadlokan karon sa mga tawo mao ang kagaw sa utok sa mga tawo nga mangtamay o mang-discriminate sa mga COVID-positive.

Gani morag mortal sin na kon moigham ka o moubo kay ang mga mata sa mga judgemental nga tawo makatutok dayon.

Dili man usab nato mabasol ang uban nga mobati og kahadlok kay delikado man kaayo ang COVID-19, busa maneguro lang usab nga dili mataptan.

Apan angayan hunahunaon sa matag usa kanato nga wala tuyoa sa mga tawo nga mataptan sa kagaw ug nahitabo lang nga sila ang naigo.

Usa ka COVID-positive nga taga sitio Zapatera kinsa anaa sa quarantine facility sa Barangay Luz ang mibutyag sa iyang identity aron ipakita nga normal sila ug labaw sa tanan tawo usab sila nga anaa dinhi sa ayong kalibutan.

Siya si Roy Comeros Genares, principal sa eskwelahan sa Brangay Sirao, Cebu City nga maoy nagpasiugda og mga physicial ug spiritual activity sulod sa quarantine facility. Naa silay zumba dance isip pagpasingot aron padayon nga lig-on ang ilang resistensya ug naghatag usab kanila og positibong panan-aw sa kalibutan nga puno sa paglaum.

Suporta sa usa’g usa ang ilang gikuhaan og kusog aron makasugakod sa krisis nga ilang giatubang.

Respeto ug makatawhanon nga pagtratar ang gikinahanglan sa mga tawo nga nataptan sa bisan unsa nga balatian.

Ang acting head sa City Welfare Office sa Lapu-Lapu City nga si Annabeth Cuizon naigo usab sa kagaw kinsa mi-broadcast sa iyang Facebook portal sa iyang sentimento ug mga pangutana sa kasegurohan sa mamahimong reaksyon sa mga tawo inig gawas niya sa hospital.

Posibleng nakuha niya ang virus taliwala sa iyang pagserbisyo niining panahon sa krisis sa COVID-19.

Sama kang Annabeth ug Roy nga nagpaila sa ilang identity bisan og kasamtangan silang nakigkombate sa virus, ang ilang gihimo naghatag og kusog sa uban nga unang atubangon ug buntogon ang virus nga mitakboy sa utok sa mga judgemental.