Inmates delikado

Usa sa paagi aron malikayan ang paspas nga pagtinakdanay sa COVID-19 mao ang social distancing. Apan bisan pa sa kapolisang nagbantay, daghan gihapong nagpabadlong.

Kana lang may ipanghatag ang gobiyerno nga relief goods or amelioration assistance diha sa mga barangay, dili gyod makapaabot ang usag-usa sa ilang turno.

Mora bitaw og nahadlok ang kada usa nga mahutdan, unya wala nay madawat. Ngano kahang maglublob man sa ilang hunahuna ang maong negatibong pagbati?

Kay segun sa ilang kasinatian, dili tanang barangay kapitan, LGUs, DSWD o uban pang mangangalagad, kinsa gitugyanan pagpang-apod-apod sa binilyong budget alang sa tanang lumolupyo, honest.

Ug kini gimatuod sa daghang pobre nga mipahungaw sa ilang kadismaya pinaagi sa pag-post niini sa social media, naningil kon hain na ang gisaad sa gobiyerno nga hinabang, sanglit bisan gamay, wala silay nadawat?

Hain na ang P200 bilyon nga cash assistance nga para sa tanan? Mabahin man gani ang liso sa talisay nga gamay ra kaayo, ang nahisgotang binilyong budget pa kaha?

Mahatagan ra man unta ang tanan, ba, kon gitarong pa lang paghiwahiwa ang kinatibuk-ang grasya.

Busa, mabasol ba ang mga timawa nga manggawas sa ilang lungag aron mangitag pagkaon tungod sa tumang kagutom?

Mabasol ba sila kon mag-abot sa Carbon ug magpunsisok pagpamalit sa ilang mga kinahanglanon human makapatid og ginagmayng kantidad sa kadalanan?

Oo, mabasol sila. Kay wala girespeto ang social distancing nga higpit gipatuman sa balaod. Apan mas mabasol kadtong mga public servants, kinsa bisan ning nagkalisod nga sitwasyon, mikatol gihapon ang kagaw sa pagpangawkaw, kinaiya nga mas kuyaw pa sa mangtas nga COVID-19.

Ang korapsiyon sa Pilipinas maoy nakapatay sa edukasiyon sa katawhan. Hinungdan, nganong gahi kaayo pasundon og balaod ang atong kaigsoonang nagtubo sa mga aseras ug sotero.

Ultimong social distancing dili makasabot. Mao nga dili gyod maputol ang kutay sa pagtinakdanay.

Ang makahingawa, kay adunay 123 ka pinriso sa Cebu City Jail nataptan nag COVID-19. Pastilan, naghuot ra ba sila sulod sa ilang selda.

Unsaon na lang? May mga magbabalaod misugyot, nga pipila kanilang may ginagmay lang kasong kriminal, pabuhian.

Apan ubay-ubayng netizens ang miangal. Kay daghang inmates nga bisag naa sa bilanggoan, sekreto gihapong minegosyog binuang. Unsa na kahag makagawas? Pagka-delikado!