Alimatok taliwala sa pandemic

Ning pandemic crisis nga giatubang sa Pilipinas, midalikyat pagpaambit pinaagi sa Facebook ang kanhi kauban ko sa trabaho, kinsa may kaugalingon nang negosyo ug haruhay na ang pamuyo.

Matud niya: “Nganong tanang pobre tabangan? Kay tungod nila, ang imong kinabuhi nahimong maayo.

Hunahunaa lang, kon wala sila. Unya ang tanang tawo pulos dato.

Kinsa man ang moalsa-kuha sa imong basura? Kinsa man ang momasag semento aron matukod imong balay?”

“Kutob sa mga butang nga wala nimo mahimo karon, natural, ikaw gyod ang mapugos sa pagbuhat sa tanan. “

“Ug mao kini hinungdan nga ang Ginoo naghimog daghang pobre aron motabang sa middle class nga makatrabaho og tarong ug sa samang higayon ang middle class miayuda sa mga adunahan aron sab mosamot ka-adunahan.

Apan actually, daghang kabos nga mas hayahay pag kahimtang sa mga middle class.”

“Sagad kanila, sige lang og suroysuroy, dula’g tong-its, inom, karaoke samtang ang middle class, sa tibuok kinabuhi, puwerting kayod, diin kada adlaw, hapit na tungang gabii makauli sa balay gikan sa trabahoan.”

Panapos post ni Galbravo nga klarong gisakitan sa pamaagi sa paghinatagay sa P5K-P8K amelioration financial assistance sa atong gobiyerno ngadto sa mga nanginahanglan.

Ang middle class, regular taxpayers sa gobiyerno. Sila, ning dakong crisis, mahutdan sab og kuwarta ug sama sa mga kabos gutomon pod.

Apan tungod kay maoy giuna sa kagamhanan ang pagtunol og hinabang sa mga tapolan, kinsa kadaghanan nagsalig lang pirme sa suborno, nalimtan intawon ang mga middle class, kinsa puno sa pagkamapailobon ug pagkamasinaboton.

Ang sakit lang paminawon, kining mga walay kaikog, kinsa bisag gihatagan nag P8K sa DSWD, mireklamo kay kulang pa.

Usa ra kuno ka semana kutob. Dinha pa gyoy drayber sa traysikad sa Negros, kinsa gigamyan ra sa nadawat nga P6K.

Good for one week ra kuno kini kay iyang mga anak wala maananad og kaog sardinas. Baboy ug chicken gyod kuno. Busa, mihirit nga ang P6K himoong P12K.

Gawas sa kuwarta, nahatagan na baya ni silag kinilong bugas ug canned goods. Pero gusto pang magpadugang.

Pastilang kinaiyaha! Mora gyog mga alimatok, nga samtang may dugo pang masupsop sa lapalapa dili gyod moundang hangtod dili mahurot.

Luoya sa atong nasod, sa?