“Social distancing”

“Social distancing” kon ang pagbaton og igo nga gintang sa gilay-on gikan sa laing tawo maoy usa sa mga paagi aron malikayan ang dugang pagkuyanap sa coronavirus disease (COVID-19).

Sa iyang executive order nga nagpaubos sa dakbayan sa Sugbo sa “general community quarantine” hugot nga gimando ni Cebu City Mayor Edgardo Labella ang “social distancing.” Bisan ang Department of Transportation (DOTr) mipagawas og direktiba sa pagpatuman niini diha sa mga pampublikong sakyanan.

Kinahanglang minusan og katunga ang naandang gidaghanon sa mga pasahero sa mga pampublikong sakyanan aron mapatuman ang maong kamanduan. Grabing naapektuhan niini mao ang mga habal-habal ug mga pribadong motorsiklo tungod kay dili na mamahimong dunay angkas ang driver sa motorsiklo.

Bisan ang magtiayon dili mamahimong maglumon sa motorsiklo aron kuno malikayan ang pagpanakod sa kagaw. Ug aron pagpatuman sa kamanduan, dunay mga checkpoints ipahigayon ang kapolisan, military, LTO, LTFRB, ug mga sakop sa disaster team sa dakbayan.

Diha sa mga checkpoint tagsa-tagsa nga gisusi ang temperatura sa mga tawo nga molabay aron pagbantay wala bay posibling nagdala nila sa sakit.

Apan ang problema mao ang kakuwang sa gamit paghimo niini resulta nga magpundok ang mga sakyanan ug mga tawo diha sa checkpoint.

Kun inyong nabantayan sukwahi kaayo ang sitwasyon diha sa mga checkpoint sa lagda nga buot nilang ipatuman. Kun dunay usa lang ka carrier sa sakit sa mga matanggong sa checkpoint namiligrong manakod siya sa tanang mga tawo nga uban niyang natanggong.

Angayang dugangan sa kagamhanan ang gidaghanon sa ilang mga portable thermal scanner diha sa mga checkpoints aron malikayan nga maghuot na hinuon ang mga tawo ug mga motorista.

Dia pay laing kataw-anan nga lagda pagpatuman sa “social distancing”—gidid-an lakip ang magtiayon nga maglumon sa motorsiklo.  Dili ba kataw-anan nga atong gidili nila nga mosakay og usa ka motorsiklo samtang didto sa ilang panimay nagtupad sila sa pagpangatulog?

Si LTO regional director Victor Caindec miangkong kataw-anan ang maong lagda apan wala silay mahimo gawas sa pagtuman niini sanglit kamanduan kini gikan sa ilang ulohang buhatan. Mao nga wala tay mahimo gawas sa pagtuman niini.

Niining panahon sa krisis di sad makatabang ang pagsubi-subi, mas maayong mosunod sa mga

lagda ug mas labaw’ng maayo og ang mga tigpatuman sa lagda mogamit sab sa ilang sentido kumon aron masiguro gyud ang atong kaluwasan.