EDITORYAL - Propesyon sa mga gwardiya

Ang nahitabong pagpang-hostage sa usa ka gwardiya og daghang mga tawo sa usa ka mall didto sa San Juan City tungod sa matud pa dili maayong pagtratar kanila sa ilang kompanya angay nga lilion sa mga anaa sa gobiyerno.

Ang gibuhat sa maong gwardiya usa ka salawayon ug supak sa balaod. Tungod kay gibutang niya sa peligro ang kinabuhi niadtong mga inosenteng mga kaparehas niyang mga yanong empleyado ra usab.

Nilanat og napulo ka oras ang maong hitabo nga niresulta sa  pagtahan sa gwardiyang si Alchie Paray. Dunay usa ka gwardiya nga napusilan atol sa hitabo.

Bisan pa man tuod nga sayop ug supak sa balaod ang iyang gihimo ug angay silang silotan ug mabilanggo, kinahanglang tan-awon sab ug hatagan og pagtagad sa gobiyerno ang iyang mga giwadwad nga reklamo batok sa iyang kompanya.

Posibleng naabot sa punto nga ang gwardiya napuno na ug bisan unsaon pa niya pagpailob ug pagpaubos wala na niini mahimo ug labaw nang wala sab siyay kasumbongan maong nakabuhat siya sa maong salaod.

Dili lang si Paray ang dunay susamang problema. Daghang mga gwardiya ang nag-agwanta sa ilang trabaho bisan og nakalapas na sa Labor Laws ang ilang mga ahensya tungod sa kabalakang sila taktakon ug lisud baya karon ang pagpangita og trabaho.

Gawas pa niana, dunay mga gwardiya nga nangreklamo tungod sa kagrabe kagamay sa ilang sweldo, lapas 12 oras ang ilang duty, walay remittance sa SSS ug PagIbig Fund ang ilang mga security agencies.

Kun buot hunahunaon, mas daghan pa ang mga gwardiya itandi sa mga polis sa nasud tungod kay makita pa ang presensya sa mga gwardiya sa halos tanang establisamento sa kadalanan itandi sa mga polis nga magpatrolya. Dili unta sirad-an sa mga naa sa katungdanan kining kaso ni Paray tungod lang kay nadakpan na siya ug nabuhian ang mga hostages pinaagi lang sa pagpapriso kaniya.  Angay maghimo og aksyon ang mga magbabalaod bahin sa mga yangungo sa mga gwardiya.