Patuyang sa kolo ug latik
Usa sa labing tam-is nga ganti sa taas nakong bakasyon sa trabaho mao nga makatagpilaw na sa hapon.
Nga dugay na nakong gihandom apan wa maangkon sa kapin sa tulo ka dekada nga pagpanibya. Kansang kaliboan ug usa ka tahas way gipiling takna sa tibuok adlaw ug gabii.
Nakapasamot sa kalalim sa way kabalaka nga pagtagpilaw mao ang meryinda nga mapailubon nga magpaabot inig mata.
Labi na sa niaging adlaw. Nga malipayon nga nisugat sa pagtangka namo sa kusina ang nag-asu-aso pang linung-ag nga kolo ug espeso nga latik.
* * *
Ang akong asawa, nga mas pilian og pagkaon, way pupanaganang nikuha og tibuok hiwa sa kolo ug gibahogan sa latik sa iyang gamayng plato. Nahibung ko nga di man unta ganahan og labihan katam-is, sama nga kontra sang parat, niingon siya nga mas lami unta kon mas bagtok pang latik.
Kay nagtilagak na man sang akong laway, nikusi sab dayon ko sa kolo ug gipasawom sa latik dayong hamong.
Nihunong lang mi og kaon dihang nagdungan og kaikog nga duha na lang ka gagmay nga hiwa sa kolo ang nahibilin.
* * *
Gikuhaan nako og hulagway ang salin nga kolo ug latik ug gipa-ibog sa akong mga higala sa Facebook. Labihang daghana nga nangayo ug mas daghan ang nangutana diin gikan ang kolo kay gikamingawan na nila pag-ayo apan wa na igkita sa ilang nahimutangan nga mga dakbayan sa nagkalainlaing kanasuran.
Naanad na kong di sila magkahiusa sa mga balita sa Covid-19, kahimtang sa panahon ug presyo sa lana nga akong gimantala. Apan way nilalis sa ka-pareson sa kolo ug latik.
* * *
Dayon namong panihapon, nireklamo ang akong asawa nga nag-aslom ang iyang kutukuto. Iyang gibasol ang latik kay may tuno sa lubi. Nihukom siyang mopahuway og sayo nga di lang mokaon. Gipasaligan nako siyang busog pa sa among meryinda busa di sab manihapon.
Dihang nahinanok na siya, ug samtang nag-recording ko sa Arangkada, nagkutoy ang akong tiyan maong gihurot nakong kolo sa way pagtandog sa latik.
Pagka tungang gabii, nimata ang akong asawa ug nanihapon. Nagpasalamat kong wa nay kolong nakapahinumdom niya sa latik.
Bakasyon ray makahatag sa tanang panahon pagpatuyang, pagpaibog ug pag-agwanta sa sangpotanan sa pagkaon.
* * *
- Latest
