EDITORYAL - Prayoridad sa edukasyon ang unahon

Wala makauyon si Cebu Gob. Gwendolyn Garcia sa request alang sa pagpamalit og mga school supplies nga alang niya dili makatabang sa pagpalambo sa kalidad sa mga Sugboanong kabataan aron makasakbang sa global stage. Ang request gihimo atol sa Provincial School Board meeting niadtong Pebrero 4 ning tuiga. Diretsong gibasura sa gobernadora ang hangyo kay gawas nga wala kini motutok sa academics improvement, dugang gastos lang kini sa mga ginikanan.

May punto ang gobernadora nga dugang gastos lang kini ug mas maayong mga libro nalang maoy pamaliton.

Apan maayo usab kun mo-upgrade ang mga public schools nga makabaton og modernong mga classrooms nga dunay interactive board displays ug robotic kits.

Sa miscellaneous school supplies para sa Kindergarten pagkatinuod mahimo ra kining ihatag ilabi na kay dili tanang ginikanan may kwartang ikapalit para sa gamiton sa ilang mga anak. Kabahin sa mga bangko ug lamesa sa kindergarten nga mokabat og P17.4 milyones dili ba kaakohan na kini sa nasudnong gobiyerno?

Apan kadtong uban sama sa laptops para sa mga magtutudlo ug tablets murag sobra ra sab kaayo. Kay kaning mga butanga kinahanglan kanunay ma-upgrade ug dili basta maayong ipasa-pasa lang og gamit sa mga magtutudlo kay dali ra kining maguba ug makagasto hinuon og dako.

Husto ang gobernador sa pagbalibad sa dili kaayo gikinahanglang mga gihangyo nga dili sab makapalambo sa kalidad sa academics sa mga tinun-an.

Mas labing maayong gipangayo tingali kun pundo alang sa dugang trainings sa mga public school teachers aron mapalambo ang ilang estilo ug pamaagi pagtudlo sa math, science ug English.

Mag-unsa man nang mga modernong gamit kun ang mga magtutudlo kuwang og kahibalo ug ang uban wala gani makasabot sa kun unsa ilang gitudlo?

Sa nasud sa Singapore, malampuson ilang mga tinun-an didto tungod kay ang mga subjects sama sa math ug science sa kindergarten palang gitudlo na sa tinamban nga paagi sa mga sakto pagkabansay nga mga magtutudlo.

Ang kwarta sa gobiyerno adto ra gyud gamiton sa mga prayoridad aron dunay padulngan ang bili niini.