Pirmiha ang operation

Nalipay ko kay nag-operation ang mga sakop sa Cebu City Transportation Office (CCTO) kagahapon sa buntag batok sa mga motorsiklo nga nagpunsisok sa karsada atubangan sa Lahug Elementary School ug sa dapit sa JY Square.

Resulta, daghang motorsiklo ang ilang nasakmit kay nasakpan nga ang mga nag-drive walay lisensya ug ang uban walay mga rehistro. Ambot ngano ning uban nga magpadagandagan man sa ilang sakyanan nga way rehistro ug wala sila’y lisensya?

Miipon ko sa mga driver sa habalhabal dapit sa JY Square nga nagpundok kay nahadlok nga madakpan. Wala sila masayod nga sakop ko sa Cebu City Traffic Management Board.

Ang uban kanila, migamit na sa mga motorsiklo nga bag-o pa nilang napalit ug wala pay rehistro.

Ang uban sab kay nangahadlok nga madakpan kay nagsul-ob ra og sinelas, samtang ang uban nagtago-tago kay ang ilang mga motorsiklo kuwang sa gikinahanglan nga kagamitan, sama sa side mirrors.

Ako silang gisultihan nga motuman ra gyud unta sa balaod.

Dili man kamo parahon sa mga traffic enforcer kon makita nila nga sa inyong bayhon wala mo’y kalapasan, ug ang inyong motor kompleto ra sa mga himan.

Niagi man ko sa Lahug kagahapon sa buntag apan bisan og wala sila makaila kanako, kay nag-helmet man ko, wala ko nila paraha kay ang akong motor kompleto man ug makita nila nga wala ko mahadlok kon ilang parahon.

Apan kon nahitabo pa nga gipara ko sa mga traffic enforcer, wala man ko nila mailhi, ipakita ra nako ang akong lisensya ug ang rehistro sa akong sakyanan.

Apan diay awhag nako ni ma’am Alma B. Casimero nga kanunaya ang paghimo og operation kay aron maanad ang mga driver nga mahadlok sila mo-drive kon dili motuman sa balaod.

Sakit kaayo ang gisulti sa usa ka netizen diha sa Facebook kay samtang gidayeg niya ang CCTO sa paghimo og operation, apan ang nakadaot lang kuno kay mo-operate ra ang CCTO kon masul-an.

Palihog Ma’am Alma, maghimo ta og strike force nga estriktong manakop sa mga driver nga makahimo og kalapasan sa mga lagda sa tukma nga pagmaneho og sakyanan.

Usa niini kanang mga driver nga panahon sa gabii dili mopasiga sa ilang suga ug daw multo ang ilang sakyanan nga magdagan sa karsada nga kuyaw kaayo makaaksidente.

Kaniadto sa bata pa ko dunay gitawag og Operation Kilum-kilum nga gitumong aron pagpanakop sa mga magpadagan sa sakyanan nga pundir ang suga, ug labaw na kadtong dili mopasiga sa suga.

Ang balaod mao nga “half hour before sunset” kinahanglang mopasiga na ang driver sa suga sa iyang gimaneho nga sakyanan.