Negosyo na ang Sinulog

Gidili na ang pagkuha og live video coverage sa Sinulog sulod sa Grandstand. Busa kinsa kadtong gusto nga mokuha og live video kinahanglan pa nga mananghid sa gikasabot sa Sinulog Foundation nga mao lamang ang makakuha sa live video sa mga contigent nga mohimo sa ilang finale performance sulod sa Cebu City Sports Complex.

Una kining higayon nga gidid-an sa pagkuha og live video ang mga manan-aw sa Sinulog. Ang pagdili naggumikan sa gisudlan sa Sinulog Foundation nga kasabotan uban sa MyTV cable nga major sponsors sa Sinulog.

Negosyo na gayod ang Sinulog. Kun kaniadto ang Sinulog Foundation, aron makabawi sa gasto, namaligya og tiket aron ang makapalit niini makasulod sa Cebu City Sports Center ug klaro nga makatan-aw sa mga contingent nga nagsayaw ug nga aron dili sila mainitan, karon lahi na.

Dili na pamawi sa gasto ang tuyo sa foundation sa pagpamaligya niini og tiket (nga karon wristband na) kun dili kita o ginansiya na gayod.

Tungod niini mosugod na ko sa pagpangutana kun asa paingon ang kita ug ginansiya sa Sinulog Foundation. Dili ba lang kaha ni mapadulong sa lungkab ang kita sa foundation.

Kinahanglan nga mopakita na sa kuwentada ang Foundation sa kita nila aron malikay kini sa pagduda nga basin og himuon lamang unya kini nga gatasan sa mga nagpadagan niini.

Kining ako mga pangutana ug sugyot lamang isip usa ka yanong lungsoranon nga nagpakabana sa imahe sa Sinulog Foundation nga nagbarog sulod sa dugay nang katuigan nga wala maduhigi og pagduda.

* * *

Mahurot gyod kaha ang gidili nga drugas? Nangutana lang ko tungod kay nagkadaghan ug wala nay putol hinuon ang pagkasakmit niini.

Unsa may buot ipasabot niini? Sinyalis ba kini sa kalamposan sa kampanya sa gobyerno batok ning maong suliran o buhi kining kamatuoran sa ilang kapakyasan.