Higala ko si Santo Niño

Matag higayon nga saulogon sa katawhan ang kapistahan ni Señor Santo Niño dinhi sa dakbayan sa Sugbo, dili gyud nako kalikayan ang paghanduraw niadtong makapakurog sa kaunoran nga aksidente dul-an sa 19 ka tuig na ang nakalabay.

Tiaw mo ba nga usa ka tawo naligsan ang bitiis sa pangunahang ligid sa Prime Mover nga sakyanan? Kay daghan man ang dili suheto kon unsa kining Prime Mover, mao kana ang sakyanan nga makita nimo nga moguroy og mga trailer nga kargahan og container van.

Ang tawo nagsakay sa iyang motorsiklo (usa ka V-50 nga motorsiklo) didto sa  Sitio Bakhaw, Barangay Catmon-Daan, lungsod sa Catmon ug nagpaingon unta kini dinhi sa siyudad kaniadtong Hunyo 25, 1995. Nag-uwan niadtong higayona.

Tul-id ang karsada. Samtang nagdagan ang motorsiklo sa maong tawo, nalantawan niya nga may ikasugat siyang usa ka trailer nga kusog ang pagdagan og nagbabag-babag ang dinaganan.

Nakasinggit ang tawo og “Santo Niño, tabangi ko!” Pila ma’y estorya, naligsan siya sa Prime Mover.

Nadungog sa tawo ang nilagupok sa iyang motor nga nakupog kay napasok kini ilawom sa trak, ug nabatyag sa tawo nga naghigda na daplin sa karsada niadtong higayona nga ang ligid sa Prime Mover milatay sa iyang tuo nga paa.

Wala kawad-i og panimuot ang maong tawo, ug gipaabot na lang niya kon unsa kasakit ang kamatayon nga iyang masinati niadtong higayona.

Apan, ang tawo mibangon nga nagpangita sa tuo niya nga sapatos nga natangtang ug nadala sa ligid.

Mibangon ang tawo ug nakita niya nga nababag sa karsada ang trailer ug ang driver niini ingon sa wala masayod unsay iyang buhaton, samtang naglingkod gihapon atubangan sa manobela.

Ang karsones sa maong tawo, nagisi dapit sa paa ug naporma kini og letra nga “L.”

Hangtud karon dia pa ang maong karsones isip handumanan.

Gagmay ra nga pangos ang nasinati sa maong tawo, ug halos dili makatuo ang mihugop nga mga tawo nga naluwas ako niadtong higayona.

Ako maoy gitabangan sa higala ko nga si Santo Niño ug giluwas gikan sa tino nga kamatayon.

Kaniadtong 1981, may mihatag kanako og imahen ni Santo Niño ug ako kining giampoan kada adlaw.

Sa buntag mananghid ko niya nga molakaw na, ug inigka gabii, mopahibawo ko niya nga niabot na ako. Kaniadtong 2014, may mihatag nako og pinaskohan nga “bronze Santo Niño” ug kanunay gyud nako siya nga iuban sa akong mga lakaw.

Siya maoy akong abyan ug tigbalantay kanako, ug nisalig ko nga sa mga kakuyaw, iya akong panalipdan. Pit Senyor!