Kaayohan ug kadautan ni Ursula

Unahon nato ang kabangis o kadautan ni Ursula, ang bagyong mikuso kuso sa nasod ug wala makalikay ang Sugbo.

Gani nagbilin kini og casualty diin usa ka habalhabal driver ang nakalas human misungasong sa bagyo.

Si Jonathan Canggas naanod sa baha dihang naabtan sa karsada sakay sa iyang motor, napalgan ang iyang lawas gahapon sa udto.

Samtang laing usa ka tawo ang na missing didto gihapon sa northern part sa Sugbo.

Daghang mga tawo ang gipabakwit aron maseguro ang kaluwasan nila gikan sa kabangis ni Ursula.

Gidaut usab ang kabalayan, mga poste sa kuryente ug mga pananom nga kasagaran sa amihanang Sugbo.

Samtang sa uban bahin sa nasod grabe usab ang kadaut nga ilang nahiaguman sa naasoyng kalamidad.

Sa mga tawong manguli sa ilang mga probinsya kontrabida gyud si Ursula tungod kay wala man palargaha ang mga barko.

Maayo gani kay giatiman sila sa kagamhanan sa dakbayan sa Sugbo gipasilong sa Sports Center, gipakaon ug gihatagan pa gyud og pinaskohan.

Hinuon nakalarga ra man sila human libkasa sa coastguard ang suspension sa mga biyahe dihang giwagtang sa PAGSA ang publis storm warning signal.

Samtang bisan og mabangis si Ursula nakamugna gihapon kini og kaayohan sa pagsugat sa pasko.

Tungod kay wala man kaayo mogara ang mga tawo sa pagpabuto og firecrackers kay nahadlok sa bagyo o ba kaha maglikay nga mabasa sa ulan nga gidala niini.

Sa talaan sa DOH Region 7 upat ka mga batan-on ang nabiktima sa pabuto apan minor injuries lang, mas ubos kini og 63 porsiento itandi sa miaging tuig.

Sa mga kasinatian nga sama sa katalagman duna gayud kitay makat-onan nga pagtulon-an aron magamit natong sumbanan simbako adunay laing kalamidad nga masinati sa katawhan.