Ang tahas ni Jose

DISYEMBRE 22, 2019: Ikaupat nga Domingo sa adbiyento

Mga Pagbasa:   Is. 7;10-14/Sal. 24/Rom. 1;1-7/Mt. 1;18-24

Usa sa mga nahimong tahas ni Jose mao man ang pagkahimong ama-ama sa atong Ginoong Jesus. Sa ato pa siya ang bida ning atong ebanghelyo karong Dominggoha. Bisan pa man kun sayud siya nga ang bata nga ianak sa iyang asawa dili iyaha apan tungod sa iyang dakong gugma sa kabubut-ong Diosnon iyang gidawat ang maong kaakuhan uban ang dakong pagsalig nga ang Dios maoy mopahimutang sa tanan. Nakakita ko sa usa ka imahen nga gikugos ni Cardinal Chito Tagle diin si Maria nahikatulog samtang si Jose maoy nibantay sa batang Jesus. Iya kining gikugos kugos samtang nagpahuway ang iyang asawa niadtong higayona. Nindot nga talan-awon sa usa ka Amahang mahigugmaon ngadto sa iyang anak.

Ning maong Domingo atong pamalandongan kining mosunod:

1. Ang pagsaulog sa Pasko sa Pagkatawo mao man ang paghubo sa atong kaugalingong mga interes aron paghangop sa mas makahuloganong katuyoan. Gitawag kini og Sense of Purpose.

2. Ikaduha, Sama ni San Jose nahimong mas makahuloganon ang pagkamasinugtanon kun anaa ang pagsalig. Kun wala ang pagsalig, nan unsaon man pud nato pagsunod?

3. Ikatulo, kita kinahanglang mopahulay aron sa ingon makita nato ang Ginoo diha sa atong kinabuhi. Ang pagpahulay dili sabton nato ingon nga wala kitay buhaton o igo lang kita sa paghagok lamang. Ang paghikatulog usa man ka pagkab-ot og hustong enerhiya nga kinahanglanon sa matag usa kanato aron sa ingon mamahimo kitang abtik ug tagana sa pagsugod sa laing hugna sa atong kinabuhi. Ang maong pagpahulay nagpasabot man og pagsinati sa atong kugalingon ingon man ang pagsinati sa presensiya sa Dios.

4. Sa dihang gipahimugso ang atong Ginoo, gipahimugso siya diha sa kahilom. Ang maong kahilom usa man ka pagpadayag sa kalinaw nga dili mahimong bayran og bisan unsang kalibutanong bahandi. Ang malinawong panghunahuna dili mahimong bayran og salapi.

5. Ang kahilom maoy pagsinati usab sa Dios. Si San Jose sa hilom namalandong ning mga butanga sulod sa iyang kasingkasing sama ni Maria. Ang damgo ni Jose mao man ang iyang nindot nga kasinatian sa Diosnong mensahe nga nagdasig kaniya sa pagsugot sa mando gikan sa langit.

Unta sa atong pagsaulog ning pasko sa pagkatawo sa atong Ginoo makita unta nato ang bili diha sa matag damgo nga magambalay panahon sa atong pagpahuway. Damgo nato nga sama ni San Jose atong mahimamat ang Dios nga nagpakatawo mismo mismo diha sa hawanan sa tagsa tagsa nato ka mga panimalay.