Nagkuwang ang Nurses?

Nagreklamo na ang mga pribadong tambalanan dinhi sa Sugbo tungod sa pagnihit sa mga nurses. Kini ang hinungdan ngano napugos sila sa pagsirado sa pipila ka floor sa ilang mga tambalanan nga naghatag og kalangay sa pag atiman sa mga pasiyente nga nagpaabot og taas nga oras sa mga emergency rooms ug hallways. Kini ang gikonpirmar ni Joseph Stephen Descallar, Presidente sa Philippine Nurses Association Cebu Chapter atol sa 4th Nursing Leaders Summit niadtong Disyembre 15, 2019.

Si Descallar nagkanayon nga pipila ka mga tambalanan dinhi sa Sugbo ang kinahanglan og 200 ka mga nurses samtang adunay government hospital nga nanginahanglan og 50 ka mga nurses.

Ang ideal nga nurse-to-patient ratio sa mga ward kay usa ka nurse sa matag napulo ngadto sa napulog duha ka mga pasiyente.

Pero duna pod panahon nga ang nurse mapugos sa pag atiman sa katloan ngadto sa kalim-an ka mga pasiyente sulod sa napulog duha ngadto sa napulog unom ka oras. 

Ang sa Intensive Care Unit o ICU lahi tungod kay ang gikinahanglan usa ka nurse, usa ka pasiyente. Ang nahitabo karon usa lang ka nurse sa usa ka ward.

Wala man gud magkulang ang nurses sa Sugbo. Gani nagbaha man kini sila. Nanarbaho naman lang gani ang uban ani nila sa mga call centers.

Dili ang nurses maoy nagkulang kun dili ang suweldo nga gihatag sa mga pribadong tambalanan ngadto sa mga nurses.

Kasagaran sa mga pribadong tambalanan mipahimulos sa katakos sa mga nurses tungod kay gihatagan lamang nila kini og gamay nga suweldo maong manglayas ug dili magdugay sa pagtrabaho.

Walay laing mabasol nganong wala nay nurses sa mga pribadong tamabalanan kun dili ang mga tagdumala ra usab sa mga tambalanan.