EDITORYAL - Makasulbad ba sa traffic?

Daghan ang naglaum nga pinaagi sa ikatulong taytayan nga gitukod karon nga magkonektar sa mainland Cebu ug Mactan Island makasulbad kini sa problema sa trapiko sa Metro Cebu. Mahimong makatabang gyud kini kun ang gitan-aw ang gidaghanon lang sa mga sakyanang magtaboktabok sa kasamtangang Mandaue-Mactan Bridge ug sa Justice Marcelo Fernan Bridge  nga mao karoy gisaligan.

Ang ikatulong taytayan anha manukad sa Cebu City tabok sa Mactan Channel ug adto motugdon sa lungsod sa Cordova. Kung gikan sa habagatan ang mga sakyanan, dili na sila kinahanglang molahos sa Mandaue City kun sila padung sa isla sa Mactan.

Tinuod makamenus gyud tingali sa trapiko sa Mandaue apan dili garantiyang mas paspas na unya ang dagan sa mga sakyanan kun pananglitan padung sila sa airport sa Lapu-Lapu City.

Kini tungod kay  sa pagkakaron walay gihisgutang road widening sa mga karsada diha sa Cordova. Mangatanggong gihapon sila sa traffic ini og abot didto tungod sa kagagmay sa mga karsada niini karon.

Wa man sab kaayoy gidungog nga dunay dakong proyekto nga palapdan ang mga karsada sa maong lungsod ilabi na kun asa padung kining ikatulong  taytayan. Basin maparehas lang kini sa Cansaga Bridge nga hagbay ra untang nahuman, apan pagkatinuod dili gyud kaayo dako ang natampo pagpamenus niini sa traffic diha sa utlanan sa Mandaue ug Consolacion.

Tungod kay gikan sa Mandaue City lapad pa ang dalan sa dayong pagsaka sa maong taytayan apan ini og tabok na sa habig sa Consolacion, pwerteng gamaya sa coastal road. Busa may oras lang nga gipili ang mga biyahidor kay nanagana silang ma-traffic sa maong gamay nga dalan, ang resulta balik sila sa naandang dalan padung sa Consolacion.

Maayo unta’g giapil ang daan sa pagplano sa ikatulong taytayan ang road widening sa Cordova ug Lapu-Lapu aron 100 porsiyento gyud ang positibong epekto sa pagsulbad sa problema sa trapiko.

Basin maglabad lang ang ulo sa taga Cordova sa traffic kay naibanan ang sa Mandaue apan sa ila napasa ang problema.