Badlongong motorcycle drivers misiaw

Buhi pa ba ang no counterflow nga balaod, o ang Executive Order (EO) 034 ni kanhi Mayor Tommy Osmeña nga mo-impound sa mga sakyanan nga masakpan sa kapolisan nga mo-counterflow?

Kon buhi pa kini, nganong bisag asang main road nga maagian, diin naay klaro kaayong yellow solid line sa tunga, maglumba man gihapon ang daghang motorsiklo nga mo-counterflow?

Tungod ba kay si Osmeña wala na sa puwesto ug ang mipuli sa paglingkod sa Cebu City Hall si Mayor Edgardo ‘Ed’ C. Labella? Nagpasabot ba kini nga kon ang kanhi mayor nga maoy nag-implementar niining balaora wala na, hinayhinay usab mahanaw ang gahom sa (EO) 034?

Kahinumdoman nga panahon sa pagpangamahan ni Tommy sa atong dakbayan, daghang motorsiklo na-impound. Pero pagpuli ni Ed ang maong mga sakyanan gipangbuhian.

Resulta? Namaot si Tommy sa mga mata sa buloyagong motorista ug nahaduol si Ed sa kasingkasing sa mga linalang nga masinupakon sa balaod.

Nan karon, kinsa ba nilang duha ang husto? Usahay, tungod sa politika, ang katul-id sa pagbinuotan sa usa ka lider mahiwi ug mapasagdan na lang ang istriktong pagpatuman sa balaod.

Sa tinuoray lang, kon dakpon gyod tanang sakyanang mo-counterflow ug i-impound sa dapit nga dali ra kan-og taya, segurado ko, nga ang trapik sa kadalanan moluag.

Kay mawala ang mga badlungon ug mahabilin ang masinunuron sa Driver Code of Conduct nga dapat irespeto sa tanan.

Ning maong paagi mailhan kinsa ang buotan nga drayber ug kinsay masinupakon?

Ug kinsa kadtong masinupakon, mas nindot nga dili na hatagan og lisensiya sa pagdrayeb kay sila ang hinungdan sa kahuot sa trapiko ug mga dugoong aksidente sa karsada.

Kun dili na padraybon ang mga badlongon, mapugos gyod ang nahabilin nga magmatngon. Hangtod nga ang makita natong magdagan sa karsada pulos mga sakyanan nga gimaneho sa manggitahuron ug disiplinadong drivers.

Sa mga nagkuros nga dalan anaa gyoy traffic enforcer nga magdupadupa aron sa paghapsay sa trapiko kada rush hours.

Tanang motorsiklo nagdali. Sagad walay kahadlok mo-counterflow. Hinungdan, nga pindoton gyod nakog dugay akong sirbato aron sila dakpon sa enforcer. Pastilan, pasagdan ra man, uy!

No wonder. Badlongong motorcycle drivers ning panahon ni Ed, misiaw! Ano ba yan?