Halloween

Basta taliabot na gani ang kalagkalag mosulod gyud dayon sa atong hunahuna ang Halloween.

Daghan sa mga episodes nilang Jessica Soho ingon man ang Magandang Gabi Bayan ang nakapunting gyud sa mga sugilanon nga kahadlokan.

Mga kalag nga nagkondenar, mga engkanto, mga demonyo. Apan kun buot hunahunaon, ang Halloween dili panahon sa kahadlokan kondili panahon kini sa mga Balaan.

Ang pulong Halloween (All Hallows Eve) o All Hallows Even mao ang gabii diin atong gipasidunggan isip mga Kristiyanos Katoliko ang mga Santos ug Santas bisan kanila nga wala malakip pagkasuwat sa Roman Martyrology.

Kining mga santosa o mga balaang tawo ang nakalabang ngadto sa kadaugan ug kahimayaan gumikan sa ilang dakong gugma sa Ginoo nga ilang magbubuhat. Busa angayan lamang nga sila atong pasidunggan ug mao kini ang mahitungod sa All Hallows Even nga gi-shortcut na nuon ngadto sa Halloween.

Kuyog sa pag-shortcut niini mao usab ang sayop nga pagsabot kun panlantaw niini.

Mao nga daghan sa mga tawo karon ang nihimo og mga costumes mga balansayon nga kun dili man gani pagano nahimong ganghaan sa matag demonyo nga molihok diha sa  kinabuhi sa usa ka tawo. Hapit na pud ang kalagkalag. Imbis atong himoon nga sentro ang mga butang walay hinungdan, atong himoon kining mosunod:

1. Pag-ampo sa novena ug pagpamisa ingon man ang pagsimba alang sa tanang mga nangamatay.

2. Paglikay sa mga kaboang nga balansayon sama sa ghost hunting, spirit of the glass ug uban pang mga occult games.

3. Pagpanamastamas sa bukog sa tawo pinaagi sa paggamit niini alang sa katuyoang pinasikad sa patuo tuo ug uban pa.

4. Paghuboghubog sulod sa mga sam-ang nga maoy hinungdan sa daghang mga problema ug kagubot.

Busa balaanon nato ang kasaulogan. Mas dalaygon nga atong pasidunggan ang mga santos kaysa atong himoong inspirasyon ang mga demonyo diha sa atong gipangsul-ob o diha sa atong mga binuhatan gyud mismo.

* * *

Kun ikaw sa kinabuhi

Dunay pangutana alang sa mga babaye: “Sugot ka Coca Cola imong body apan abridor ang imong nawong?”

Daghan sa mga nikomentaryo ug daghan ang nikatawa.

Apan luyo ning maong katawa ug mga emojis anaa ang buhing kamatuoran nga kitang mga tawo hinawayon.

Hinawayon dili tungod kay buot lang kitang manaway. Nanaway kita tungod kay nagtuo kita nga nakabentaha sa uban. Nanaway kita tungod kay may buot kitang tagoan ug kini mao ang atong kakuwangan.

Kining maong kakuwangan dili nato buot nga sa uban makit-an mao nga nanlimbasog kita nga makauna diha sa atong pagahimoong pagtamay sa uban.

Ning paagiha nahimong daw bully kita sa uban nga tungod niini atong gi-bully mismo ang atong kaugalingon.

Mao tingali ni ang hinungdan kun nganong daghan ang mahilig sa tsismis kaysa kamatuoran ug tinarong nga mga balita. Sa atong panaw sa kinabuhi anaa na gyud ang bisan unsang bati apan sa laing bahin angayan natong hangpon ang atong kahuyangan aron dili kita mamahimong focus sa kahuyangan sa uban.

Angayan natong angkunon ang atong kakulang aron sa ingon dili nato hatagan og igong pagtagad ang kakulang sa uban ug dili nato isipon nga ato silang naulipon tungod kay mas labaw pa kita kay kanila.

Ang pagpakahilom atong himoon ingon nga atong gahum aron atong masala ang bisan unsang dili  maayo diha sa atong hunahuna.