Sinulog sa Oktobre

Matud pa sa MCWD, siyam ka barangay sa dakbayan sa Sugbu ang gikataho nga makasinati na usab sa lain’g pagkunhod sa rasyon sa tubig sa umaabot nga mga adlaw gumikan sa pagkunhod usab sa produksyon sa pasilidad sa patubig sa Jaclupan.  Dili na lang tingale maghuwat ang mga lumolupyo sa Cebu City sa Sinulog Festival karong Enero 2020. Karon pa lang, magsinulog na kita aron adunay ulan nga mobundak og mahulipan ang nahubas nga tubig sa mga pasilidad sa MCWD. Na hala, Pit Senyor na, bisan Oktobre pa!!!

 Apo, sapopo!

Mipasar og ordinansa ang Konseho sa dakbayan sa Manila nga maghatag og P800 nga pahalipay kon inadlawan ngadto sa matag senior citizen nga magsaulog sa ilang adlaw’ng natawhan. Dako kining kalipay sa mga senior citizen apan mas labaw’ng dako ang kalipay sa ilang mga apo (grandchildren) kay hayan sila man unya ang makapahimulos sa dakong bahin sa maong pahalipay.  Tinuod gayod ang panultihon nga “Basta Apo, Sapopo”!!!

Sweldo ra’y ubos

Segun sa balita, aduna’y gipaabot nga pagsaka sa presyo sa mga LPG products karong semanaha.  Niining kahimtanga, makalaum usab ang mga konsumidor nga mosaka ang presyo sa pagkaon sa carenderia o di ba kaha mogamay na ang takos sa pagkaon.  Matud pa sa akong silingan, “Pastilan ang panahon karon, tanan pulos na misaka. Ang ako na lang SWELDO ang nagpabilin nga ubos.”  Faeetz!!!

Daug ang vendors

Human mahawan ang mga sidewalks sa mga vendors, ang sunod nga hagit nga gipaabot sa DILG ngadto sa mga lokal nga kagamhanan mao nga magpabilin ang maong mga agianan nga hawan ug libre sa mga ‘obstructions’.  Niining gubat tali sa KAHAPSAY ug PANGINABUHI, maglaum kita nga, sama sa iring ug ilaga, adunay daw duwa sa tubig-tubig ug dakop-dakop nga mahitabo tali sa kagamhanan ug sa mga vendors. Gilantaw nga sa kapulihay, modaug ang vendors, ilabi na kon magsingabot na ang eleksyon. Hala no?

Strike out ang nag-strike

Sa gipahigayon nga transport strike niadtong Lunes, Septyembre 30, walay gikataho nga reklamo gikan sa mga sumasakay nga natanggong sila gumikan sa maong protesta, kon dili ang kalangay sa biyahe tungod sa kahuot ug kahinay sa dagan sa trapiko. Tataw nga dili na epektibo ang transport strike sa pagpadayag sa mulo ug yangongo sa mga transport groups. Niining higayona, mora’g sila maoy na “STRIKE OUT”!!!