Toriring kon mahubog, di makumpiyansahan

Ang inom maoy tuburan sa panaghigala. Ang basong ipasa sa gunner ngadto sa nanag-inom og tuba, bino o serbesa, daw tulay nga magsumpay sa matag kasingkasing nga nakasinati  sa  dinagayday sa pagbinatiay pinaagi sa likidong giyarok nga moagi gyod sa dughan.

Ang paggamit og usa lang ka baso nagpasabot nga tanang naa sa grupo, usa ra sab sila panahon sa ilang panagpundok. Magdungan pagtalidhay sa takna sa kalipay. Ug magtinabangay sa yugto sa kasubo.

Apan ning kalibotan, ginaingon nga sa usa ka bulig nga saging anaa gyoy usa o pipila nga mosukwahi. Labi na kon kini nakitkitan nag kuwaknit. Mausab gyod ang dagway sa pagkahinog. Mao gyod kini ang kanunay kong gimatngonan matag higayon nga adunay manghagad nakog inom. Kon wala bay war freak? Dinhay higayon nga adunay naghikay, kinsa miimbitar sa among grupo. Wala ko mokuyog. May huhungihong man god nga ang maong birthday celebrant, magmaoy inig kahubog. 

Suod kong mga higala, sayod gayod nga kon moinom ko, usa ray tumong: for enjoyment purposes. Di ko gusto nga mouli sa amoa nga minghoy. Gusto ko nga happy and satisfied.

Hinungdan, nga wala ko nila pugsa. Sila na lang ang mitambong. Nagbaha kuno didto ang lamiang pagkaon ug ilimnong makahubog. Pero, may nakaguba sa ilang panaghudyaka.

Pagkahubog sa birthday celebrant, nagkuha kinig taas nga armas ug nagpatuyang pagpabuto. Haskang alibawaga nilag panagan! Sa miaging Domingo, Agosto 25, usa ka Eduardo Rosquitos, construction worker, 30,  gigabas-patay sa silingan ra sab nilang si Roger Paje, 48, chainsaw operator, kinsa nangimbitar niyag inom kuyog sa laing usa ka higala, diin didto himoa mismo sa balay sa suspek.

Pagkahubog, nakatulog si Rosquitos ug ang laing kauban sa salog, samtang si Paje nga nailhan nang laig ulo kon makainom, nagtikawtikaw pa.

Ning tungora, mikuhag chainsaw si Paje ug gigabas ang liog ni Rosquitos nga wala na makamata. Maayo gani, kay nakamata ang laing kauban ug nakadagan.Tingale, nagtuo ang suspek nga punoan sa kahoy ang nangligdas sa salog. Maong gigabas. Demalasa, sa? Busa, maayo gayod nga kon dunay manghagad natog inom, sutaon pag-ayo kon wala bay nahatipon nga motoriring ang utok kon mahubog. Kay daghang namatay sa sobrang kumpiyansa.