GCTA for sale

Usa ka adlaw human molapas ang 15 ka adlaw nga tagal ni Presidente Rodrigo Duterte alang sa mga gibuhian nga priso ubos sa Good Conduct Time Allowance law pagtahan sa ilang kaugalingon aron dili sila dakpon ug isipong pinangita sa balaud, gipahibawo sa Department of Justice nga gisuspenso ang pagdakop sa nahabiling priso nga wala mo-surrender.

Giangkon ni DOJ Secretary Menardo Guevarra nga iyang giawhag ang kapolisan pinaagi sa Department of Interior and Local Government (DILG) nga dili una dakpon ang mga wala mo-surrender samtang ilang giklaro ang listahan gikan sa Bureau of Correction.

Matud ni Guevarra nga dili klaro ang listahan sa mga gibuhian ubos sa kontrobersiyal nga GCTA law kinsa ang mga nag-atubang og heinous crime. Si Duterte unang mibahad nga ang mga mapakyas pag-surrender iyang isipon nga wanted ug motanyag pa siya og ganti alang sa ilang pagkasikop patay o buhi.

Ang mga nagtoon sa balaud nasayod nga illegal ang buot mahitabo ni Duterte. Apan bisan kun kwestiyonable ang kamanduan sa presidente mitahan pagbalik ang 1,717 sa kapin sa 1,900 ka mga konbiktado sa heinous crime nga gibuhian. Apil na nila ang upat ka mga konbiktado sa pagdagit, paglugos ug pagpatay sa managsuon nga sila si Marijoy ug Jacqueline Chiong.

Ang DOJ mismo nasayod nga dili mahimo ang kamandoan sa Presidente nga dakpon ang mga wala mo-surrender. Ug mao ni hinungdan nganong nimando kunohay ang DOJ nga isuspenso ang pagpanakop. Apan ang tinuod wala silay basihanan aron dakpon ang mga gibuhian na.

Wala mangiskapo ang maong mga konbiktado aron sila maisip nga pinangita sa balaod. Gibuhian sila og tuyo sa gobyerno ubos sa GCTA law. Bisan kun ang uban kwestiyonable ang pagbuhi tungod sa kurapsiyon sa BuCor apan ang kamatuoran nagpabilin nga wala sila moiskapo.

Kun dunay angayang gukdon si Duterte dili ang mga konbiktado kun dili ang mga kurakot nga opisyal sa BuCor. Sa imbistigasyon sa Senado nabulgar ang paghitak sa korupsiyon sa maong ahensiya.

Ang mga ebidensiya nga nahipos sa Senado nagpakita nga ginegosyo gyud sa mga opisyal sa ahensiya ang GCTA. Wala pa ni labot sa ubang illegal nga kalihukan sama sa pagpayuhot og drugas ug prostitution.

Matud sa Senado nakahipos sila og text messages gikan sa mga opisyal sa BuCor ug sa mga nakabuhi nga konbiktado pagprobar nga gipamaligya ang GCTA.