PLDT hinay’g serbisyo

Nagkadugay ang Philippine Long Distance Telecommunication (PLDT), nagkahinay ang serbisyo. Usa ka concerned citizen mitug-an sa akong higalang manedyer nga grabe kuno mopaantos kining maong buhatan kada higayon nga gikinahanglan kayo ang ilang seryoso nga pagpangalagad.

Matud pa sa maong tinubdan nga hapit na lang siya moluhod sa pagpunayg hinangyo sa taga-PLDT, apan ang tanang pagpakiluoy ug pagpangintawon, napunta sa mga bungol nga dalunggan ug insensitibong dughan. Paita!

Unsa kahay nakapagahi sa balatian ning PLDT, no? Tungod ba kay hari na sa pagnegosyog telecom and internet lines ang pagtan-aw nila sa ilang kaugalingon?

Wala makaagwanta ang higala sa manedyer sa bati kaayong serbisyo sa PLDT. Mibalhin kini sa Globe. Ug iyang panginahanglan, dihadiha, giasikaso dayon.

Ako mismo, biktima sa kahinay’g serbisyo sa PLDT. Ning tuiga lang, hasta kapila madaot among linya sa wifi. Kada guba, ako gyoy mangunay pag-adto sa ilang opisina nga anaa mahimutang sa Osmeña Boulevard, diin puno gyod ang mga lingkoranan sa nangreklamong customers, kinsa nag-antos pagpinaabot kon kanus-a pa mag-usab ang PLDT ning ilang kalangayan.

Ang sakit palandongon, kay diehard ko sa PLDT. Bisag giunsa kog kombinse sa lainlaing kompaniya sa telecom ug internet nga mobalhin nila, hugot kong midumili. Ingon ini ko ka loyal sa PLDT. Gani, sukad sa sinugdanan hangtod karon, on or before time gyod kong mobayad sa among PLDT monthly bills. Unya, mao ba kini ang ibalos sa PLDT sa among kabuotan–ang pag-unya-unya lang pirme sa importanteng serbisyo nga among gipangayo sa labing dali nga panahon?

Ning kalaki sa PLDT, dinagkong kuwarta ang nawala sa mga negosyante. Sa ako lang bahin, isip kolumnista, naputol ang pag-email ko sa mga napundong bililhong artikulo paingon sa The Freeman Banat News Publishing, diin ang uban dili magamit tungod kay nabahaw na kayo. Ikaduha, ang target date for articles submission puwerting gubaa dungan sa pagkaguba sa nindot impresiyon nga monas ginhawa kong giampingan.

Ingon niini kabug-at ang matang sa krus nga gipapas-an sa PLDT sa ilang diehard customers. Nagsalig lang kay wala pa moabot ang higanteng kompaniya nga isakbang sa ilang kapamahimuslanon. Makatarunganon pa kaha kining ilang gihimo? Hinungdan, nga bisag taas kag pailob, mapuno ug mobuto gyod.